Isiboshwa sidubule amaphoyisa sisesitokisini kwafa sona
KUFE isiboshwa ebesitokile esiteshini samaphoyisa eSiphingo, okuthiwa sivulele ngenhlamvu emaphoyiseni kwalimala ezinye iziboshwa eziyisihlanu.
Kushaye isikhathi sokuloba izolo ingakatholakali eminye imininingwane ngesiboshwa esishone kulesi sigameko esenzeke ngoMgqibelo ngezithuba zabo 7 ebusuku.
Kuthiwa isiboshwa esidubulile besitokile nezinye ebezilethelwa ukudla ngamaphoyisa ezitokisini kanti sizokhipha isibhamu sidubule.
Kuthiwa amaphoyisa nawo abuyisele ngenhlamvu, kwashona lesi siboshwa kwathi ezinye zangeniswa esibhedlela.
Okhulumela amaphoyisa KwaZuluNatal uLieutenant-Colonel Thulani Zwane usiqinisekisile isigameko, wathi alikho iphoyisa elilimele.
“Kuvulwe icala lokubulala, awokuzama ukubulala nawokweqa esitokisini. Kusaphenywa ngalesi sigameko kanti eminye imininingwane ayikakapheleli,” kusho uZwane.
Kusolwa ukuthi lesi siboshwa besifuna ukweqa nezinye. Akwaziwa ukuthi isibhamu esisetshenziswe kulesi sigameko ngesikabani. Esinye isigameko esenzeke ngempelasonto, owesilisa oneminyaka engu-25 uboshelwe icala lokuphanga nelokuzama ukubulala. Uboshwe esigamekweni esenzeke eCowies Hill eThekwini lapho owesilisa oneminyaka engu-55 ehlaselwe abasolwa abathathu abebehlomile emzini wakhe.
Kuthiwa abasolwa badubule lo wesilisa esifubeni. UZwane uthe ummangali naye ubephethe isibhamu okuthe uma ehlaselwa waphindisela, umsolwa wabaleka nalaba ababili abehamba nabo. Amaphoyisa athole isidumbu somunye wabasolwa ehlathini nomunye obelimele oyiswe esibhedlela, waboshwa. Umsolwa wesithathu akakatholakali njengoba ebalekile. Oboshiwe kulindeleke ukuthi avele maduze eNkantolo yeMantshi ePinetown.