Kufihlwe umndeni owaqothwa
KUBE nenjabulo nomunyu emngcwabeni wamalungu omndeni oqothwe eVlakfontein, eGauteng, ngesikhathi kuvela ukuthi useboshiwe osolwa ngokuwabulala.
UNgqongqoshe wezokuPhepha eGauteng, uNkk Sizakele NkosiMalobane, izolo uveze ukuthi umsolwa wesibili obefunwa uthuli amaphoyisa ugcine eboshiwe.
Ubekhuluma ngesikhathi kufihlwa amalungu ayisikhombisa omndeni wakwaKhoza okunguNksz Mbali Khoza (51) nodadewabo uNksz Dudu Khoza (46), indodakazi yakhe uNksz Nomfundo Khoza (28) nabazukulu uKarabo (11), Luyanda (7) Nkanyiso (2) noSibongakonke (2) abulawe ngesihluku ngumlisa okusolakala ukuthi wazenza isihlobo sawo.
Abanye babo batholakala begqitshwe endlini abanye batholakala beboshiwe.
Amaphoyisa aseGauteng akhiphe isitatimende esiveza ukuthi sekuboshwe ababili ngalesi sigameko okungumlisa oneminyaka engu-27 obefunwa uthuli obezama ukubaleka aphumele ngaphandle kwakuleli, nowesilisa oneminyaka engu-61 oboshwe eDobsonville.
UNkk Nkosi-Malobane uthe okumkhathazayo wukuthi lo mlisa noma eboshiwe kuyokwenzeka aphume ngelinye ilanga ngoba esechithe ingxenye ethile yesigwebo sakhe.
Amalungu omphakathi abelalele abezwakala ethi akalethwe kuwona lo mlisa ukuze aqede ngaye ngenxa yokucasulwa okwenzekile.
UNkk Nkosi-Malobane uphinde waveza ukuthi lo mlisa wabulala lo mndeni ngezikhathi ezingafani.
“Lo doti womuntu akazange ababulale ngelanga elilodwa kodwa ubenalobu buqili obunzima lapho abethola khona oyedwa noma ababili ababulale ngesikhathi bese elinda abanye nabo ababulale kodwa lokhu kuzovela uma icala liqhubeka,” kusho uNkk NkosiMalobane.
Umakhelwane walo mndeni oseGauteng, uNkk Stefina Tshabuzi, uthe namanje usashaqekile ngenxa yento ayibona ngesikhathi kutholwa izidumbu zamalungu omndeni wakwaKhoza ngesonto eledlule emuva kokuthi begcine ukubonakala ngo-Okthoba 19.
Uveze ukuthi umsolwa wambona ngosuku okusolakala ukuthi lo mndeni wabulawa ngalo.
Uthe umsolwa wambingelela izikhawu ezingaphezu kwezine ngalolo suku nokuyinto eyamumangaza. Uthe kwamkhathaza nokumbona eshanela ekhipha izibi ezaziyinhlabathi endlini. UNkk Tshabuzi uthe ngenxa yokukhathazwa wukuthi kwase kuphele izinsuku eziningi bengawuboni umndeni wakwaKhoza belokhu bebona umlisa owayeqashe khona, babona kungcono ukuthi bayobheka. Uthe kwabhodlozwa isicabha kwatholakala izidumbu zamalungu omndeni.
Emngcwabeni kuvele ukuthi izingane ezincane zatholakala ziboshiwe, zigxokogxwe amehlo, amathumbu evele ngaphandle kubonakala sengathi bezishaywa ngento eyinsimbi futhi kunezinsolo zokuthi zadlwengulwa.
Elinye ilungu lomndeni, uMnuz Sandile Khumalo, linxuse ukuthi uma kuphenywa kubhekwe nokuthi lo mlisa wayethunywe wubani kungagcini ngokuthi kuboshwe yena kuphela.