‘Sizolungenela ukhetho ngonyaka ozayo’
INFP isiyenze izinhlelo zokuqinisekisa ukuthi ngonyaka ozayo iyalungenela ukhetho lukazwelonke.
Lokhu kungexa yokuhluleka kweqembu ukungenela ukhetho lohulumeni basekhaya ngoba lingayikhokhanga imali kwi-Independent Electoral Commission.
UMengameli weqembu, uNkk Zanele MagwazaMsibi, ukhankase KwaNongoma izolo ukulungiselela ukhetho okulindeleke ukuthi lube ngoMeyi ngonyaka ozayo.
Okhulumela uNkk Magwaza-Msibi, uMnuz Canaan Mdletshe, uthe sebebeke imali ukuze bakhankase balungiselele nokhetho.
Uthe bazohlangana nezinhlaka ezehlukene njengoba kuyiwa okhethweni.
“Sizohlangana namabandla ahlukene, abaholi bomdabu, izinhlangano zezitshudeni nezinye izinhlaka. Siyibekile nemali yokuthi singenele ukhetho ukuze kungenzeki okwenzeka ngo-2016. Sizongenela ukhetho kuzona zonke izifundazwe kodwa kukhona abathi iNFP kayinamali.”
Iqembu likholelwa ekuthini u-60% wabantu elizobajuba kwezobuNdunankulu noma eziShayamthetho nasePhalamende kumele kube yintsha nabesifazane.
Mayelana nabazojutshelwa eziShayamthetho, uthe ubuholi busazohlangana bunqume bese kuyiwa emagatsheni azokhetha.
“UMengameli unxuse umphakathi waKwaNongoma ukuthi uvotele uMnuz Vusumuzi Nkwanyana ukuze alethe ushintsho kuwadi 20 njengoba kuzoba nokhetho lokuchibiyela. Uzogxila ekuletheni amanzi ayinkinga kule wadi.”
Uthe itende beligcwele phama.