Imizamo yokulwa nesifo sasekudleni i-listeriosis
ISIKHUNGO esicwaninga ngezifo eNingizimu Afrika, iNational Institute for Communicable Diseases (NICD), nenhlangano yezempilo emhlabeni wonke iWorld Health Organisation (WHO), sebeqhamuke nezindlela zokulwa nokubheduka kwesifo esitholakala ekudleni, i-listeriosis.
I-NICD ikuqinisekisile ukuthi lesi sifo esigcine sikhungethe abantu abangaphezu kuka-1000 sinqandiwe.
Bathe imininingwane yabo evela ezikhungweni ezizimele nakuhulumeni ikhombisa ukuthi ukubheduka kwalesi sifo kuphelile.
Ngokusho kwabo izigameko zabantu okukholakala ukuthi bangenwe yiso seziphansi kakhulu.
Iziphathimandla zoMnyango wezeMpilo kuzwelonke, iWHO nabeNICD bahlanganyele ukuqhamuka nezindlela zokuqinisekisa ukuthi ukudla kwakuleli kuphephile ukugwema i-listeriosis.
Okunye abaqinisekise ukuthi bazokwenza wukuqhubeka nokubheka nokuphenya ngezigameko zabantu abangenwa yi-listeriosis ukuze bathole kusenesikhathi.
“Kuzohlolwa zonke izikhungo ezikhiqiza ukudla okusuke sekulungele ukudliwa. Ezinye zalezi zindawo seziqalile ukuhlolwa ngokusebenzisana nomasipala,” kusho abeNICD.
Bathe bafuna nokubhekisisa ukuthi kukhona yini ukuxhumana phakathi kokudla okutholakala nalesi sifo neziguli ezitholakala zinaso.
NgoSepthemba nonyaka, uNgqongqoshe wezeMpilo kuzwelonke, uDkt Aaron Motsoaledi, umemezele ukuthi ukubheduka kwalesi sifo sekunqandiwe. Lokhu kulandela ukubheduka kwaso ngoDisemba nyakenye. Lokhu kwaholela ekutheni kumenyezelwe ukuthi abantu abagweme ukudla izinhlobo ezithile zokudla okubalwa kuzo upholoni nokunye.
Ngokusho kwalesi sikhungo izigameko ze-listeriosis kade zaqala ukuba khona kuleli futhi zisazoqhubeka nokuqhamuka.
I-NICD inxuse abantu ukuthi baqhubeke nokulandela imigomo ebekiwe njengokugwema ukudla okunengozi yokuba ne-listeriosis kubantu abanegciwane lengculazi, isifo sikashukela, umdlavuza nokunye. Kulokhu kudla kubalwa okwakhiwe ngobisi, ukudla okwakhiwe ngenyama okulungele ukudliwa, izithelo nemifino.
Bathe abantu abaqhubeke nokuqinisekisa ukuthi bagezisisa izithelo nemifino ngaphambi kokuyidla, bakuphekisise ukudla, bahlukanise ukudla okuphekiwe nokuluhlaza.