Kubhekwe isinyathelo sikaDe Lille
ANGASE asungule iqembu lakhe lezepolitiki uNkk Patricia De Lille osule kwiDA ngesonto eledlule ngesikhathi esephuma esikhundleni sakhe sokuba yiMeya kaMasipala waseCape Town.
UNkk De Lille uthe uzocacisa kuleli sonto ngezinhlelo zekusasa lakhe kodwa kunamahlebezi aqinile okuthi uzosungula iqembu lakhe namakhansela asule kwiDA ngesonto eledlule.
Ngesikhathi esula kwiDA, uNkk De Lille uthe uzizwa ekhululekile kwingcindezelo akade engaphansi kwayo ngoba ubengakwazi ukusiza abantu ngempilo engcono.
“Ngikhululekile ekugcineni, indlela engizizwa ngayo ifana naleya yokuvota okokuqala ngo-1994 emuva kokuthi sithole inkululeko. Bengingakwazi ukuletha impilo engcono kubantu ngenxa yobandlululo oludla lubi kwiDA. Baningi abathi angizongena emaqenjini abo epolitiki kodwa ngisazocabanga kahle ngekusasa lami. Sisabonisana namakhansela asulile ukuthi sizokwenzenjani,” kusho uNkk De Lille.
UMnuz Shaun August obewuSotswebhu kuMasipala waseCape Town uthe yena namakhansela asulile bayabonisana ngekusasa labo futhi baxoxisana nabantu abaningi.
“Sixoxa nabaxhasi, abaholi bomphakathi nabo bonke abantu baseCape Town ngezinto ezahlukene ngoba asikazi okwamanje noma sizosungula inhlangano yepolitiki noma sizokwenzani. Engingakusho nje wukuthi iDA isakhathalele abamhlophe kakhulu ngoba abantu baseGugulethu, Khayelitsha naseMitchells Plain abanakiwe,” kusho u-August.
Umhlaziyi wezepolitiki uMnuz Thabani Khumalo uthe uNkk De Lille angase avuse i-Independent Democrats okuzokwenza kube nokwehlukana kwezepolitiki ngoba inhlangano yakhe izobonakala njengekhaya lamaKhaladi okusho ukuthi kuzohamba abantu abaningi akade sebevotela iDA.
“UNkk De Lille uyathandwa wumphakathi wamaKhaladi azibona sengathi awanakiwe, ngimbona ewushisa umbango eWestern Cape. I-DA ngeke inqobe ngamavoti amaningi. Emuva kokhetho luka-2019 kungase kube nohulumeni wokubambisana engingazi-ke ukuthi uzoholwa yiDA noma yi-ANC kodwa engingakuqinisekisa wukuthi uNkk De Lille uyobe ekhona uma eseneqembu lepolitiki,” kusho uKhumalo.