I-ANC ixwayisa ngemihlangano yangasese
I-ANC isixwayise amalungu ayo okubalwa abaholi abaphezulu, amalungu esigungu esiphezulu enhlangano, abaholi bezifundazwe kanjalo namalungu jikelele ukuthi angahlangani ngasese ngezinto ezithinta inhlangano.
UNobhala jikelele wale nhlangano, uMnuz Ace Magashule, uthe lokhu bakwenza ukuze banqande ukwehlukana ngaphakathi enhlanganweni.
Uthe alikho ilungu le-ANC elivumeleke ukuthi libe yingxenye yomhlangano wohlangothi olwalufuna kukhethwe abathile engqungqutheleni yaseNasrec noma ngemuva kwayo.
“Kumele yonke imihlangano ethinta inhlangano ibikwe ezinhlakeni ezifanele ze-ANC. Akukho mhlangano okumele ubekhona ngaphandle kokuba kubikwe ezinhlakeni,” kusho uMagashule.
Ukusho lokhu esitatimendini sabezindaba ngemuva komhlangano wesipesheli wesigungu esiphezulu sale nhlangano.
UMagashule usho lokhu nje kuke kwaba nemibiko yokuthi kunetulo lokuketula uMengameli Cyril Ramaphosa okuthiwa lakhandwa komunye wemihlangano ofaka abaholi abaphezulu bale nhlangano owawuseThekwini.
UMagashule uthe kuzomele kube nemibiko ngemihlangano amalungu abe nayo kubalwa nosomabhizinisi.
“Kumele kube nemibiko ngemihlangano ebekhona neqeqebane elithile losomabhizinisi. Izinto ezithinta inhlangano kumele zixoxwe ezinhlakeni ezifanele kube nokuhloniphana uma kuxhunywana.”
Uthe abaholi abaphezulu kanjalo nabezifundazwe bazohola imikhankaso baxhumane nezinhlaka zenhlangano ngezinto ezithinta imihlangano ethinta i-ANC.
UMagashule uthe bayaqhubeka nokuhlangana nezinhlaka ezehlukene ezifundazweni njengoba izolo nanamhlanje behlangane nesigungu saseGauteng.
“Abaholi besigungu esiphezulu bebeseFree State, bazoya naseEastern Cape nakwezinye izifundazwe ukugqugquzela umkhankaso iThuma Mina ukuze kuthuthukiswe impilo yabantu.”
Odabeni lweVBS Mutual Bank, uMagashule uthe udaba lusezandleni zekomiti elibheka ukuziphatha kwamalungu.
“Sisamile ekutheni labo abayotholakala benecala kumele babhekane nomthetho. Udaba ludluliselwe esigungwini esibhekele ukusebenza kwansuku zonke kwenhlangano ukuze sinqume.”
Uthe bayasebenzisana nekhomishini kaJaji Raymond Zondo ephenya ukulawulwa koMbuso yidlanzana.
UMagashule uthe bazohlangana namadlelandawonye ukuze kuxoxwe ngezinkinga ezibhekene nezinkampani ezingaphansi kukahulumeni nezinkinga ezibhekene neSAA.