Inkakha nomdlalo okhuluma ngoMadiba
INKAKHA yakuleli edume umhlaba wonke ngokubhala imidlalo yeshashalazi ehlukene, uMbongeni Ngema, isiveze ukuthi maduzane izothungatha intsha ezobonakala ilingisa emdlalweni okhuluma ngempilo kaMandela.
UMbongeni ukusho lokhu ngesikhathi ehambele isikhungo samaciko iPlayhouse, ngoLwesihlanu, eThekwini.
Uthe njengoba kuzoqala uDisemba kuzoba nomdlalo othi Woza Albert.
Kulo mdlalo uMbongeni ulingisa indawo ephambili noPercy Mtwa inkakha esizakhele igama ngokulingisa emidlalweni yeshashalazi.
“Ngiyanimema nonke ukuthi niphelele kulo mdlalo njengoba mina sengilingise kuwo iminyaka engu-40.
“Abanye benu njengoba nilapha nje babengakabi bikho ngesikhathi ngiqala ukulingisa kuwona ngakho ngithi phumani ngobuningi benu nizowubona ukuthi ukhuluma ngani. Mina ngeke nginitshele kodwa niyosala nithokozile futhi ninolwazi ngezinye izinto,” kuchaza uNgema.
Uthe akukhona nje ukuzokhuluma ngalo mdlalo okumlethe kulesi sikhungo kodwa uthungatha nabalingisi abasha.
“Lo mdlalo uzobe ukhuluma ngempilo kamengameli wokuqala wentando yabantu uNelson Mandela. Intsha ngiyayikhuthaza ukuthi ifike njengoba konke sizokwenza ekuqaleni konyaka nokuyothi kushaya uMashi sibe sesiyela ngasemaphethelweni okuthungatha abazoba yingxenye yawo,” kuchaza yena.
Uthe uma sebeqedile ngomdlalo ngeke ubukwe kuleli kuphela kodwa uzobukwa nasemazweni aphesheya.