Usiza abasemakhaya ungoti wezindlebe
UFUNA ukusiza abantu abadala abavela ezindaweni zasemakhaya ukuthi bahlolelwe izinkinga zezindlebe ungoti walo mkhakha.
UMnuz Qiniso Ndlovu (38), owelapha izinkinga zezindlebe nezokukhuluma, usesungule uhlelo lokusiza abantu abadala ukuthi bathole usizo lwamahhala lokuhlola izindlebe.
UNdlovu wesikhungo esihlola izindlebe siphinde sisize abanezinkinga zokukhuluma iQiniso Medical Practice esiseVryheid naseDundee, uthe ufuna ukunika abantu basemakhaya ikakhulu abantu abadala ithuba lokuthi bathole ukunakekelwa okuphelele.
Uthe phambilini usizo belunikwa abantu abamhlophe kodwa manje sebekhona abantu abamnyama abaluhlinzekayo futhi njengomunye wabo ufuna ukuqinisekisa ukuthi luyafika kubantu basemakhaya.
UNdlovu okhulele eDundee naseNewcastle uthe wenze ucwaningo lokuphothula izifundo zakhe eVryheid nokwenze wabona indlela abantu abadinga ngayo izinhlelo zabo.
“Isikhathi esiningi abantu bafika endaweni bayisebenzise bangaphinde babuye ukuzoletha usizo kodwa mina ngikubone kubalulekile ukuthi ngibuye ngizosiza abantu baseVryheid. Le ndawo ibingenabo abantu abahlinzeka usizo kubantu abanezinkinga zokukhuluma,” kusho uNdlovu.
NgoLwesihlanu olwedlule uqale uhlelo lokuhlinzeka usizo lokuhlola izindlebe kubantu abadala eVryheid naseDundee.
Lolu hlelo kulindeleke ukuthi luqhubeke inyanga yonke kaNovemba lapho abantu abadala bezokwazi ukufika bahlole izindlebe bathole nolunye usizo oluhambisana nalokhu.
Uthe bazoba seDundee ngoLwesithathu nangoMgqibelo bese beba eVryheid kulezi ezinye izinsuku.
UNdlovu unxuse abantu ukuthi bakukhathalele ukunakekela izindlebe ikakhulu ukuzihlola. Uthe kubalulekile nokuhlola izingane njengoba ethe ezinye ziba nezinkinga zizalwa.
Uphinde wanxusa abazali ukuthi bazilalele izingane uma zikhala ngobuhlungu bezindlebe ngoba ubuhlungu bezindlebe busho ukuthi kukhona inkinga ekhona.
Uthe kubalulekile ukuthi abantu bakugweme ukusebenzisa ama-earbuds avame ukusetshenziswa ukukhipha izigonogono ezindlebeni njengoba ethe yiwo adala ezinye zezinkinga zezindlebe.
Uthe uma umuntu ebona enenkinga kufanele aye kudokotela noma ayohlola izindlebe.