Abantu abayeke ukufaka imali emabhanoyini
IMALI yinto efunwa cishe yiwo wonke umuntu kodwa kuyamangaza ukuthi esikhathini samanje kusekhona abacabanga ukuthi bangenza imali ngokuyikhulisa ezinkampanini mbumbulu.
Lezi zinkampani zilutha abantu ngokuthi uma befaka imali ethize ngemuva kwesonto izobe isiphindaphindeke kaningi, isiyenze inzalo.
Ngeledlule sibikile ngenye yalezi zinkampani ezishiye abantu baseDundee namaphethelo bedinda isililo ngokulahlekelwa yizinkulungwane zabo ngenxa yokufaka imali enkampanini ebizwa ngokuthi yiForex For Africa.
Abantu abebefake imali kule nkampani bafike kulenga ingidi emahhovisi ayo sebengasabonwa abanikazi nabasebenzi bayo.
Kuyadabukisa ukuthi ngemuva kokuphahlazeka kwenqwaba yamabhanoyi kusakhona abantu abasaluthwa yiwo baze bafake izizumbulu zemali.
Omunye uthisha ogilwe wukuphahlaka kwebhanoyi laseDundee uthe uboleke kumashonisa uR18 000 abetshelwe ukuthi ngemuva kwamasonto amabili uzobe usukhule waze wafinyelela kuR50 000.
Sifisa ukuxwayisa abantu ngalezi zinkampani mbumbulu esezibaqedile abantu.
Yebo imali iyadingeka, sibi isimo ezweni kepha kuwukwandisa izinkinga ukuthatha imali oyisebenzele kanzima uyocebisa ngayo iqola elikulutha ngokuthi lizokwandisela imali.
Njengoba isimo somnotho sisinswinya nje kumele sikhulume indaba yokonga nokusungula amabhizinisi aqondile hhayi eyokufuna indlela engekho emthethweni yokwenza imali ngokushesha ngoba kubuhlungu uma abantu sebekhihla esikaNandi bekhala ngemali yabo.
Uma kukhona okuyenga ngokufaka imali enkampanini eyikhulisayo kuhle ukubika emaphoyiseni ukuze kugwenywe ukuthi agcine eseluthe abaswele ngoba bedinga imali.
Ayiphele indaba yokufaka imali kumabhanoyi, imali iyadingeka kepha akusizi ukuthatha izinqumo ezizokushiya ugilekile ngomuso.