Musani ukuvimba intsha ibe ingasebenzi
MHLELI: Namhlanje ngithi angiphawule kule nkinga ebhekene nentsha efisa ukuqashwa embuthweni wamaphoyisa aseNingizimu Afrika nakwamasipala.
Kunokukhala okuningi kwentsha ikakhulu emnyama kokuthi kunokwenzelela ekungeneni kule mibutho. Inkinga enkulu ilele kosopolitiki abasuke bephethe ngaleso sikhathi.
Labo sopolitiki yibona abasuke bephethe kule minyango okwenza ukuthi uma sekuqashwa bakhumbule izihlobo nabangani bese bethintana namakhansela abo ezindaweni nabaholi beqembu labo kwenziwe uhlu lwabazoqashwa. Kuye kuqashwe kuphela labo abalethwa ngamakhansela okungewona nje amalungu omphakathi ajwayelekile kodwa amavolontiya, amalungu eqembu nezingane zawo nabasondelene kakhulu nabaholi.
Mhleli, okubuhlungu kakhulu wukuthi laba baholi uma sekusondele ukhetho beza begijima kulaba bantu abampofu abaswele bezobakhohlisa ngokuthi bazodala amathuba emisebenzi ukuze kusebenze intsha, bebe bazi kahle ukuthi badlala ngabo, leyo misebenzi ngeyamavolontiya, izihlobo nabangani babaholi.
Ngiyazi-ke bazothi hhayi imisebenzi siyayikhangisa. Yindaba endala leyo ngoba ezinkampanini zikahulumeni ikakhulu ezakhele iTheku, kuyaziwa ukuthi ngeke ungene ungalethwanga yikhansela futhi ungaziwa ukuthi ungunamba bani enhlanganweni ephethe.
Mhleli, ngiyazi ukuthi lokhu engikubhalile kuzokwehla kabuhlungu kubaholi kodwa ngiqonde ukubaqondisa ngoba ngiyabathanda futhi yibona abahlale bethi babheke ivoti lentsha ngoba yiningi kodwa abayeke ukuyikhohlisa.
ENingizimu Afrika baningi abaneziqu zemfundo ephakeme kodwa bahlezi nazo emakhaya ngenxa yayo le ndlela yokuphatha izwe lethu. J Nyuswa ELAMONTVILLE