Indida ngesiguli esishe sisewodini
SEKUNENDIDA ngesiguli sasesibhedlela saseWentworth esiphazamisekile emqondweni okuthiwa sishe silaliswe ewodini.
Kuthiwa isiguli singeniswe esibhedlela emuva kokuthi sibe nezinkinga ezidalwa wukuphazamiseka komqondo sase siyalaliswa sagcina sizishisile salimala ngoMgqibelo odlule.
Umthombo osondelene nalolu daba uthe bathole ukuthi sithe noma sesilaliswe ewodini elaziwa ngo-D ward saqhubeka nokuba nolaka kwaze kwangenelela onogada okusolakala sengathi nabo basebenzise isankahlu kusona. Kukholakala ukuthi sibe sesivalelwa ewodini laso sodwa esibhedlela.
Leli phephandaba lithole ukuthi omunye wabasebenzi bakulesi sibhedlela uchazele abasondelene nesiguli ukuthi besilaliswe ewodini sabe sesiyahlupha sase sivalelwa ewodini.
Umsebenzi uthe isiguli sivalelwe sifihle i-cigarette lighter safike sashisa isiponji nokuyilapho sithungeleke khona sasha. Wabatshela ukuthi sishe esikhumbeni nokuthi umzimba waso ubhandishiwe kodwa asilimele kakhulu.
Ngokwezithombe ezibonwe yileli phephandaba isiguli sishe emzimbeni nasengalweni.
Umthombo osondelene nodaba uthe babikelwe ukuthi u-60% womzimba awulimele ngakho asilimele kakhulu.
Kuthiwa lo mlisa udluliselwe esibhedlela iKing Edward VIII ukuze athole usizo olwengeziwe.
“Uyiswe eKing Edward VIII emini yasekuseni engakhulumi engaphaphami,” kusho umthombo.
Ukhale ngokuthi abantu abadala emndenini abakabizwa ukuze bazochazelwa ukuthi kwenzekani. Uthe namanje basadidekile futhi bayazibuza ukuthi kwenzeke kanjani ukuthi isiguli sifakwe ewodini size sishise isiponji naso sishe kungekho muntu obesibhekile.
Uthe babona lesi sigameko sikhombisa ukungazinakekeli ngendlela iziguli njengoba abasebenzi besibhedlela bevele bavalela isiguli esiphazamisekile emqondweni endlini yaso sodwa bengasiseshile ukuthola ukuthi asiphethe lutho esingazilimaza ngakho.
Okhulumela uMnyango wezeMpilo KwaZulu-Natal, uNksz Ncumisa Mafunda, ukuqinisekisile ukuthi bayazi ngalesi sigameko wabuye wezwakalisa ukukhathazeka koMnyango wezeMpilo ngaso.
“UMnyango ukhathazekile ngesigameko lapho kube nesiguli esishayo ewodini labahlala ngabodwa. Lokhu kuthusile ngoba ngaphambi kokufakwa kulelo wodi isiguli besiseshiwe ukuqinisekisa ukuthi akukho esingazilimaza ngakho. Emva kokusha isiguli sibe sesithola ukuhlengwa abezempilo. Njengamanje sisesimeni esigculisayo kanti siyaqhubeka nokubonwa abezempilo,” kusho uNksz Mafunda.