INatu isongela umnyango ngothisha betoho
PHEZU kokuba izinyunyana zothisha zisamukele isivumelwano sokuthi othisha asebe yitoho izinyanga ezintathu kumele baqashwe ngokugcwele emnyangweni wezemfundo kodwa iNatu isixwayise ngokuthi izomangalela izifundazwe ezingasilandeli lesi sivumelwano.
Isivumelwano esisayinwe emkhandlwini obhunga ngezindaba zabasebenzi siyalele ukuthi umnyango kumele ubaqashe labo thisha uma beneziqu ezifanele.
Okhulumela uMnyango weMfundo eyisiSekelo, uMnuz Elijah Mhlanga, uthe lokhu kuzokwenza ukuthi labo thisha bazi ukuthi banomsebenzi.
Uthe indaba yothisha betoho ibiyinkinga ezifundazweni eminyakeni edlule.
“Ukuvalwa kwesahluko ngalabo thisha kuyingqophamlando.”
UMengameli weNatu uMnuz Allen Thompson, uthe bayasamukela lesi sivumelwano ngoba ezinye izifundazwe zizenzela umathanda.
Uthe izifundazwe iKwaZulu-Natal, Eastern Cape neMpumalanga bezingalandeli imigomo ebekiwe kuzwelonke.
“Sizoqapha ngelokhozi ukuthi izifundazwe ziyawulandela lo mgomo wokuthi uthisha uma esebe yitoho izinyanga ezintathu kumele aqashwe ngokugcwele.
Phambilini bekuba yizinyanga ezingu-12 kodwa nakhona bekungenzeki izifundazwe bezingabaqashi. Sizozimangalela zonke izifundazwe ezingawulandeli lo mgomo,” kusho uThompson.
Unxuse bonke othisha asebebe yitoho izinyanga ezintathu kuya phezulu beneziqu ukuthi bathinte amahhovisi eNatu.
“Sifuna ukuqoqa ulwazi lwabo bonke abangaqashiwe ukuze siye emnyangweni siyofuna ukuthi baqashwe ngokugcwele njengoba kusho isivumelwano.
Akukwazi ukuthi kungasayinwa enye into bese kwenziwa enye into.”
UNobhala jikelele weSadtu uMnuz Mugwena Maluleke, uthe lesi sivumelwano sizokweza ukuthi othisha betoho baqashwe ngokugcwele.
Uthe isigungu esiphezulu seSadtu sanquma ukuthi kumele kuqoqwe lonke ulwazi abangaqashiwe asebeyitoho isikhathi eside.
“Sizobe sesiya nabo emnyangweni siyokhala ngokuthi abaqashiwe. Siyasamukela lesi sivumelwano ngoba sizongena endaweni yesivumelwano esidala esikhona ezifundazweni.”