‘Abaphoqwe abazali ukuyisa izingane zabo ezikoleni’
INATIONAL Association of School Governing Bodies (NASGB) ithi udingeka ngokushesha umthetho ozophoqa abazali ukuthi bathumele izingane zabo ezikoleni.
Lokhu kungenxa yenkulumo kaMengameli Cyril Ramaphosa othe ucabanga ukuphakamisa umthetho wokuthi kuboshwe abazali abanqabela izingane zabo ukuthi ziye esikoleni.
URamaphosa obekhuluma nobantu baseHanover Park, eKapa, uthe izingane kumele zivunyelwe ukuthi ziye esikoleni.
“Maduzane ngizofaka isiphakamiso sokuthi sibe nomthetho ozophoqa ukuthi abazali baqinisekise ukuthi izingane zabo ziye ezikoleni. Uma bengakwenzi lokhu bazobe bephula umthetho. Ngizokwenza isiphakamiso ngoba kuwumsebenzi wethu singabazali ukuthi izingane ziye ezikoleni ikakhulu njengoba ezweni kunemfundo yamahhala,” kusho uRamaphosa.
UNobhala jikelele weNASGB, uMnuz Matakanye Matakanye, uthe udingeka ngokushesha umthetho ngoba abazali kumele bazihlanganise nemfundo yezingane zabo.
Uthe ngaphandle kwabazali ngeke imfundo yezingane iphumelele.
“Umthetho kumele ngabe kade waba khona. Abazali, ikakhulu abamnyama, abezi emihlanganweni yezingane zabo. Uma kukhona umthetho ofuze lo imfundo iyothuthuka,” kusho uMatakanye.
Uthe bayameseka uRamaphosa esiphakamisweni sakhe ngoba sizokwenza ukuthi izingane ziye ezikoleni.
URamaphosa uthe abazali kumele bazibuze izingane zabo uma ziyeka ukuya esikoleni.
“Kumele izingane nizibuze uma zingasayi esikoleni ukuthi kungani. Kumele zihlale zisesikoleni njalo,” kusho uRamaphosa.
Uthe abazali akumele bayeke izingane zizenzele umathanda uma kuziwa kwezemfundo.
“OwayenguMengameli uMadiba wathi imfundo yisikhali sokukhipha umuntu ebubheni. Yisona sikhali esingasisebenzisa ukulwa namaqembu obugebengu eKapa, ukungasebenzi kanjalo nobugebengu.”