Kuzophela ukubamba imali ngale kwemvume
SEKUZOBA nendlela entsha yokunqanda ukuthi izinkampani zizitamuzele imali zingagunyaziwe kuma-akhawunti abantu. Lokho kuzokwenza ukuthi amakhasimende akwazi ukuzinikeza imvume.
Lokhu kuvezwe uMnuz Tim Masela oyiNhloko emkhakheni weNational Payment System kwaSouth African Reserve Bank (SARB), obekhuluma esithangamini sokufundisa ngezimali ngoMgqibelo eThekwini. Bekuyisithangami esenziwa yiSolezwe, kugxilwe ekubanjweni ngokungemthetho kwamaDebit Order. UMasela ulinganise ngokuthi kulolu hlelo olusha olubizwa ngeDebit Check luzokwenza ukuthi uma ikhasimende lithatha umshalwense, ibhange liqinisekise nalo ngaphambi kokuthi kubanjwe imali.
“Sifuna ukuvikela amakhasimende nokuthi akwazi ukulawula indlela okuphuma ngayo imali kuma-akhawunti awo. Sisabheka nezinye izindlela ezizoqinisa uphenyo nokushushiswa kwabathinteka ekubhanjweni kwamaDebit Order ngokungafanele,” kusho uMasela.
Uthe olunye uhlelo lobuchwepheshe abaluhlongozayo lubizwa ngeRequest To Pay lapho ikhasimende lizokwazi ukuzithathela isinqumo ngokubanjelwa imali. Kulolu hlelo kuzosetshenziswa iselula lapho inkampani ebamba imali kumele ithumele ikhasimene umyalezo icela ukubamba. Lokhu kuzonika igunya ikhasimende ukuthi linqabe uma lingayazi inkampani efuna ukubamba imali.
“Kusekusha ukuthi singasho ukuthi lolu hlelo luzoqala nini. Sisalucubungula kodwa lusezinhlelweni zethu zeVision 2025,” echaza.
Ugcizelele ukuthi amakhasimende anelungelo lokuvula amacala emaphoyiseni uma ebanjelwe imali ngokungemthetho. Lokhu kusiza ukuthi namabhange akwazi ukuziphenyela ngaphakathi. Uveze nokuthi kuwumsebenzi wabo ukuphoqa amabhange ukuthi athathe izinyathelo uma kukhona inkampani esolwa ngokuzitapela imali.
UNkk Nomwelase Skejana oyiPhini leNhloko kwiNational Payment System, ugcizelele ukuthi abantu babheke izitatimende zabo ukuze babone uma kukhona imali ebanjwayo abangayazi. Uthe kumele bawaphendule namaSMS athunyelwa ngamabhange ngoba asuke exwayiswa ngamaDebit Order. Uveze nokuthi basezinhlelweni zokuthi kube nohlelo oluzoqeda ukuqolwa kwabantu emabhange ngenxa yokwebikwa komazisi.
Kulesi sithangami abaningi bakhale ngokuthi kunzima ukulandelela uma kukhona imali ebanjwa bengazi. Bathe amabhange awazithathi izinyathelo, kwesinye isikhathi imali iphinde ibhajwe ngisho isimisiwe iDebit Order.
UNksz Kiki Ntuli oyiPhini loMhleli weSolezwe ubonge abakwaSARB ngokubambisana nephephandaba ukufundisa nokuqwashisa abantu. Uhlelo beluphethwe umsakazi woKhozi FM uNongcebo McKenzie.