Ubhadanywe ebhalela omunye
UBANJWE oqotsheni wadluliselwa emaphoyiseni “umfundi” ozame ukubhalela omunye izivivinyo zeGeography zakwa-matric ngeledlule.
Lesi senzo senzeke ehholo iTsolo Town Hall esifundeni i-OR Tambo e-Eastern Cape. Okhulumela uMnyango weMfundo eyisisekelo, uMnuz Elijah Mhlanga, uthe bathole umbiko ngalo “mfundi” obezama ukubhalela omunye izivivinyo.
Babe sebedlulisela udaba emaphoyiseni njengoba kuyicala ukubhalela omunye, waboshwa.
“Ubanjwe ezama ukubhala iphepha lesibili leGeography elibhalwe ngo-2 ntambama ngoLwesibili. Sithole ukuthi umbhalelile iphepha lokuqala leGeography wabanjwa esebhala elesibili. Sizobheka nezinye izivivinyo zalo mfundi obebhalelwa ngoba kwayena usenecala ngoba kuzomele aye esigcawini sokuqondiswa ubugwegwe,” kusho uMhlanga.
UDkt Barney Mthembu, inhloko yezivivinyo eMnyangweni wezeMfundo KwaZulu-Natal, uthe asikho isehlakalo esifuze lesi esisabikiwe eKZN selokhu kuqale izivivinyo.
Uthe kube nesehlakalo esifundeni iSisonke lapho kumane kwangavuleka igumbi okuhlala kulo amaphepha eHistory.
Iphepha lokuqala leHistory libhalwe ngoLwesithathu ntambama ezweni lonke.
“Akubanga nokuphazamiseka okutheni kulesi sifunda ngaphandle kokubambezeleka nje imizuzu engu-10 kuphela njengoba kubizwe abavula okhiye. Ngaphandle kwalokhu akukho okunye okubikiwe,” kusho uMthembu.
Uthe abazama ukubhalela abanye kulula ukubabamba ngoba kusuke kungabafundi abaphindayo.
UMthembu uthe abasuke begadile bafika ne-timetable babheke esuke iphethwe ngumfundi ukuthi iyahambisana nale abayiphethe.
“Kubhekwa ukuthi iyahambisana ngoba kukhona abake bazame ukuthatha amashansi bakokotele i-timetable ngokuthi bafake eyabo kube sengathi ibona okumele babhale kanti babhalela abanye bese bebanjwa.” Uthe imvula ayiphazamisanga ukubhalwa kwezivivinyo.