U-Erasmus ukhale ngabadlali abangalaleli
UKHALE ngokungasebenzisi amathuba kwezakhe umqeqeshi wamaBhokobhoko uRassie Erasmus ngemuva kokushaywa yi-England ngo 12-11, emdlalweni weCastle Lager Outgoing Tour eTwickenham ngoMgqibelo.
Ezika-Erasmus zidlale i-flyhalf ye-England, u-Owen Farrell, ovalele phakathi amaphenathi amathathu, kwathi i-fullback u-Elliot Daly washaya iphenathi ekude namapali.
Ngasohlangothi lwamaBhokobhoko, uSbu Nkosi uyena yedwa okwaze ukushaya itry kulo mdlalo, kwathi uHandre Pollard, washaya amaphenathi amabili, washweba eyodwa ebizokwenza amaBhokobhoko awunqobe umdlalo ngasekugcineni.
Ngemuva komdlalo, u-Erasmus ukhale ngokungalandeli imiyalelo kwabadlali bakhe.
“Zimbili izinto ezisidlisile. Silahle amathuba, sahluleka nokulandela imiyalelo. Noma ngabe kungathiwa sishaywe ngendlela engagculisi kangakanani kodwa iqiniso ukuthi silahle amathuba,” usho kanje u-Erasmus ngemuva komdlalo.
Lo mqeqeshi ubuye wakhala ngama-lineout, obekumele ezakhe ziwasebenzise.
“Ngiyakhala kakhulu ngamalineout. Umdlali we-England uMaro Itoje uthole ikhadi eliphuzi, bekufanele sisebenzise ithuba kodwa sikhethe ukukhahlela sikude,” ubeke kanje u-Erasmus.
Noma engajabule u-Erasmus ngendlela ezakhe ezidlale ngayo kodwa kukhona okumbalwa akuthandile kwezakhe.
“Kubadlali abaningi okwenzekile kube yisifundo abangasoze basikhohlwa,” usho kanje u-Erasmus.
Umdlalo olandelayo wamaBhokobhoko azowudlala neFrance ngoMgqibelo, eStade de France.