Sizomeseka uJali ngoba ungumdlali wethu: Pitso
UMQEQESHI weMamelodi Sundowns, uPitso “Jingles” Mosimane, uzibophezele ukweseka umdlali wasesiswini, u-Andile Jali, olale ebaliwe ngesonto eledlule ngecala lokushaya umkakhe.
AmaBrazilians abemanqika ukuphawula ngesimo sikaJali okuvele ukuthi akaziqeqeshanga neqembu izinsuku eziphelele. UMosimane utshele abezindaba ngoLwesihlanu ukuthi akafuni ukukhuluma ngokwenzeka ngaphandle kwenkundla ngoJali.
NgoMeyi uJali uboshelwe ukushayela ephuzile. Icala lokushaya umkakhe uNonhle Jali lizongena namuhla emuva kokuhlehliswa ngesonto eledlule.
UJali ubedlala ngesikhathi iSundowns ihlulwa yiBaroka ngo 2-0 emdlalweni we-quarterfinal yeTelkom Knockout ePeter Mokaba Stadium, ePolokwane, ngoMgqibelo.
“U-Andile wumdlali ophezulu, udlale kahle kakhulu namuhla. Usezingeni leBafana. Sijabule ngo-Andile. Umsebenzi wethu kwiSundowns wukwenza isiqiniseko sokuthi udlala kaningi futhi kangcono kunalokhu ayikho manje. Ubonile indlela aphunga ngayo izitha nendlela aliphaka ngayo ibhola. Ungumdlali omuhle futhi siyamdinga. Sidinga ukumeseka ukuze adlale ibhola. Njengawo wonke umuntu sidinga ukumeseka.
“Ungumdlali wethu, sifake imali kuye. Kuwumsebenzi wethu, ikakhulukazi mina, ukumeseka, ikakhulukazi ngalesi sikhathi. Usangishayele into ecokeme ekubeni ebhekene nobunzima. Ababaningi abantu, mhlawumbe nami, abangadlala ngendlela adlala ngayo ezimeni abhekene nazo. Mhlawumbe nawe njengentatheli ubungacela ukungadlali. Usendaweni enhle kwiSundowns, sizokwenza isiqiniseko sokuthi siyameseka ukuze adlale ibhola. Ulapha ukuzodlala ibhola. Uma kukhona olunye usizo olungaphandle aludingayo, sizomtholela lona. Kuwumsebenzi wethu,” kusho uMosimane.
ISundowns iphunyukwe yindebe yesithathu selokhu kuqale isizini ka-2018/2019. Ikhishwe kwiCAF Champions League, MTN 8 njengoba isiphuma kwiTelkom.
Mayelana nokuhlulwa yiBaroka, uthe kufanele basemukele isimo. Wavuma ukuthi abawakhanga amathuba anele okushaya amagoli.
“Kufanele samukele, siqhubekele phambili. Phezu kokuba umdlalo besikade siwuphethe sawulawula, lokho akusho ukuthi uzowina. Kufanele ushaye amagoli. Asizange silishaye igoli. Esiwombeni sesibili belingekho ithemba lokushaya igoli. Ngeke uyiwine yonke imidlalo. Siyayibongela iBaroka.”
“ISundowns idlala kwiChampions League futhi kufanele sikulungele esizohlangana nakho kuyona. Silungiselela iChampions League. Imidlalo efana nalena iyakulungiselela ukuthi kwesinye isikhathi ungadlala kahle, ibhola lingashayi isandla ebhokisini kube yiphenathi. Lishayise kumuntu lingene phakathi, yigoli. Kunjalo ebholeni. Nathi siyohlomula ngelinye ilanga. Namuhla kubhekene nathi, siqhubekela phambili. Sihluliwe asikhonondi ngonondweba. Ngicela ningincome ngalokho.”