USredojevic akawuvali umlomo ngoMlambo
UMQEQESHI we-Orlando Pirates uMilutin “Micho” Sredojevic, uncome isilomo saleli qembu uXola Mlambo ngokuthwala iqembu selokhu kuqale isizini.
UMlambo ushaye into ecomeke ezakhe zishaya kabuhlungu AmaZulu FC ngo 3-1, esikhathini esengeziwe, kuma-quarter final eTelkom Knockout (TKO) ngoMgqibelo eMoses Mabhida Stadium, eThekwini.
UMlambo ubephasa into engasukumi phansi. Nokujika amadoda bekuthe bhe njengokwejwayelekile uma ibhola lisezinyaweni zakhe.
Unezezele ngokuthi ashaye igoli lesibili esiwombeni sokuqala esikhathini esengeziwe, elenze kwaba ngu 2-1. Amanye amagoli eZimnyama avalelwe phakathi uThembinkosi Lorch (amabili). Igoli loSuthu livalelwe phakathi uBongi Ntuli.
USredojevic akawuvali umlomo ngoMlambo, ambize njengeqhawe eselithwale iqembu izinyanga.
“UXola usethwale iqembu kusuka ngo-Agasti, waqhubeka njalo nangoSepthemba.
Yebo, uke wehla kancane efomini kweminye yemidlalo. Ngiyakhumbula nje sidlala neChippa (United), akadlalanga kahle. Uqale phansi sesidlala owomkhaya neKaizer Chiefs eshaya into ecokeme, nakhu-ke nakulo mdlalo (noSuthu) eshaya igoli elibalulekile, ngesikhathi esibalulekile.
Ngokwami uMlambo ungumdlali wasesiswini ophelele. Ngikusho lokhu ngoba uyakwazi ukuxhumanisa umdlalo, uyakwazi ukumaka athole ibhola, uyalekelela emuva, kanti uyakwazi nokuphasa. Uyalishaya negoli enjalo nje,” usho kanje uSredojevic ngemuva komdlalo noSuthu.
Eqhubeka echaza lo mqeqeshi odabuka eSerbia uthe: “Ngiyafisa indlela adlale ngayo kulo mdlalo aqhubeke njalo futhi abe nokuzethemba ngoba sisazomdinga kakhulu
ngoba sisazoba nemidlalo enzima esisazoyidlala. Kuzofanele akujwayele ukuthi ungumdlali wasesiswini, kwesinye isikhathi uzoba yiqhawe kodwa angabongwa muntu. Impela ngokwami usebenze kanzima kulo mdlalo wethu naMaZulu, ukhombisile ukuthi usezingeni eliphezulu kakhulu.” Kuzocaca namuhla ukuthi umqeqeshi weBafana Bafana uStuart Baxter uyambophela yini uMlambo esikwatini sakhe, kwazise uKamohelo Mokotjo odlala esiswini akekho ngenxa yokulimala. Ngokusho kukaSredojevic, uchazekile ngendlela ezakhe ezizinikele ngayo kulo mdlalo. “Ngijabule ngendlela abadlali bami abazinikele ngayo. Bakhombise ubukhulu nokubaluleka kwejezi nebheji leqembu. Ngifisa ukubonga nethimba labaqeqeshi elisebenze kanzima liqhamuka namacebo okuba sithole imiphumela emihle, kwazise besazi ukuthi sizodlala umdlalo onzima. Ngijabule kakhulu ngokuthi sidlulele kowandulela owamanqamu kwiTKO,” kubeka uSredojevic. Umdlalo olandelayo weBucs, izowudlala kusasa nePolokwane City kwi-Absa Premiership ePeter Mokaba Stadium, ngo-7.30 kusihlwa.