Kumiswe abasebenza emakhazeni eJozini
BAMISIWE emsebenzini abasebenzi basemakhazeni kahulumeni eJozini abaduba ukusebenza bekhala ngokungabi nomfaniswano.
Kuthiwa abasebenzi abangu-12 bamiswe ekuqaleni kwale nyanga ngenxa yesinqumo sabo sokungaphumi bayolanda izidumbu ngonyaka odlule ngoba bethi abanawo umfaniswano.
Umsebenzi ongagunyaziwe ukukhuluma nabezindaba uthe bathole izincwadi ekupheleni kwenyanga edlule zibabikela ukuthi bazohlala emakhaya inyanga yonke bengaholi ngenxa yabakwenza.
NgoMashi nyakenye leli phephandaba labika ngezikhalo zabasebenzi ababethi basebenza ngomfaniswano ogugile yize imigomo yokusebeza kwabo ithi kufanele basebenze ngosesimeni.
Abasebenzi baqoka ukufika zonke izinsuku emsebenzini kodwa basebenze ngaphakathi bangaphumi bayolanda izidumbu nokwenza eminye imisebenzi eyayidinga ukuthi bagqoke umfaniswano wabo. Leli phephandaba laphinde labika ngesigameko sokuphambana kwezidumbu esenzeka ngesikhathi abasebenzi bengaphumi nokwavela ukuthi kwase kusebenza umphathi wamakhaza yedwa.
Umsebenzi ongagunyaziwe ukukhuluma nabezindaba uthe kumanje abazi ukuthi ubani osebenzayo ngoba bamiswe bonke.
“Sihleli nje emakhaya. Okuxakayo wukuthi le nto kwakhulunywa ngayo kwaba sengathi ixazululekile ngoba sagcina siwutholile nomfaniswano noMnyango wezeMpilo washo ukuthi iphutha likuwona. Sixakiwe uma sesithola izincwadi ezithi sesiyamiswa emsebenzini,” kusho umsebenzi.
Umgqugquzeli wenyunyana yabasebenzi iPublic and Allied Workers Union of South Africa (Pawusa) KwaZulu-Natal, uMnuz Sibondlo Mathonsi, usole abaphathi bamakhaza ngokungakwazi ukwenza umsebenzi wabo.
Uthe bamise abasebenzi ngenxa yephutha elalenziwe yibo lokungabaniki umfaniswano wokusebenza isikhathi esingangeminyaka emihlanu kube kufanele ngabe banikwa umfaniswano njalo emuva kweminyaka emibili.
UMathonsi uthe namanje usalulwa udaba lokumiswa kwabasebenzi ikakhulu isinqumo sokuthi abangaholi.
“Kuzokhumbuleka ukuthi abasebenzi babengatelekile kodwa babefika emsebenzini benze eminye imisebenzi ngesikhathi besalinde ukunikwa umfaniswano,” kusho uMathonsi.
Okhulumela uMnyango wezeMpilo KwaZuluNatal, uNksz Ncumisa Mafunda, uthe akusilo iqiniso ukuthi abasebenzi bamiselwe udaba oluthinta ukungabi nawo umfaniswano. Uthe bayasazi isizathu sangempela sokumiswa kwabo emsebenzini nokungaholelwa.
“Ngeshwa uMnyango awukwazi ukwenaba ngalokhu ngoba wudaba lwangaphakathi oluphakathi kwawo nabasebenzi. UMnyango unazo izinhlelo zokuqinisekisa ukuthi umsebenzi uyaqhubeka ngesikhathi abathinteka kulolu daba besamisiwe,” kusho uNksz Mafunda.