Bakhombane ngeminwe kwaqhuma iqupha ePhalamende
KUSUKE isixakaxaka kwaqhuma nequpha ePhalamende izolo ngesikhathi ilungu le-EFF uMnuz Nazier Paulsen lixhakathisa labamba ngamawashingi uMnuz Andries Tlouamma, iPhini likaMengameli le-Agang SA.
Kudingeke ukuthi uSihlalo uNkk Thoko Didiza amise imizuzu emihlanu iPhalamende njengoba uMengameli Cyril Ramaphosa ebephendula imibuzo.
Ngaphambi kwalokhu kuqale kwasuka isixakaxaka kwakhombana ngeminwe i-EFF ikhomba amalungu eDA ngesikhathi kusukuma uMnuz John Steenhuisen weDA efuna ukukhuluma.
UDkt Mbuyiseni Ndlozi, we-EFF usukumile wabuza ukuthi ufuna ukukhuluma ngaphansi kwamuphi umgomo. Kube sekusukuma amalungu e-EFF athi ngeke akhulume kwabe sekusuka ukukhombana.
UNkk Didiza uthe uzokhuluma noSotswebhu bamaqembu womabili ngalolu daba ngoba kucishe kwaze kwabanjwana ngezandla kulesi siwombe.
Uthe namhlanje uzokhipha isinqumo ngesikhalo sokuthi umholi we-EFF uMnuz Julius Malema uthuke uSteenhuisen.
“Akekho umuntu ozoshiywa ngaphandle kulabo abangalandelanga imigomo ebekiwe ePhalamende. Ukungalandelwa kwemigomo kwenze kwaba nesixakaxaka ePhalamende,” kusho uNkk Didiza.
UMalema uthe naye uke wabizwa ngomuntu ontshontshe imali yasebhange iVBS Mutual wathi ngeke ayekele abelungu bagcogcome ekhanda lakhe.
Ususe ukukhuluma uNgqongqoshe wezaseKhaya uMnuz Malusi Gigaba, ezinkundleni zokuxhumana ngesikhathi eveza ucikicane ngesikhathi uNdlozi ethi kumele uRamaphosa athengele ongqongqoshe obhopopo baselula abangenawo amakhamera.
UGigaba uphakamise ucikicane kwaze kwasukuma noMnuz Godrich Gardee we-EFF efuna uSomlomo uNksz Baleka Mbete, angenelele.
Uqhubekile uGigaba kwaze kwangenelele noNksz Lindiwe Zulu, waveza ucikicane.