Ubonga Isolezwe obesenkingeni
UBONGA amandla eSolezwe uNkk Sibongile Sylvia Simelani (70) ohole impesheni yakhe nesibonelelo sabazukulu bakhe abane kule nyanga emuva kokungaholi ngenyanga edlule.
UNkk Simelani wathola ukuthi impesheni yakhe nesibonelelo sabazukulu kukhishwe ngumuntu othile eMzinto owenze ikhadi elisha lokuhola isibonelelo sakwaSouth African Social Security Agency (Sassa).
Izolo utshele Isolezwe ukuthi uyitholile imali yakhe waveza nokuthi ukube akazange akhulume neSolezwe akazi noma wayezoyithola yini imali.
“Ngiyabonga kwiSolezwe ngoba likhombisa ngokusobala ukuthi libakhathalele abantu. Ngafika emahhovisi alo ngididekile ngoba kungacaci ukuthi imali yami ishonephi njengoba ngathi uma ngiyohola ngatshelwa ukuthi ikhishwe wumuntu owenze ikhadi elisha eMzinto. Angikaze ngihlale eMzinto mina ngizihlalela ngaphandle kwasePinetown,” kusho uNkk Simelani. Uthe yize kumjabulisa ukuthi uyitholile imali kodwa usakhathazekile ngoba akazi noma umuntu owakhipha imali yakhe utholakele yini njengoba abakwaSassa bengamtsheli ukuthi uphenyo lwabo luhamba THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. kanjani.
“Isolezwe liwenzile umsebenzi walo ngoba lenze isiqiniseko sokuthi imali ngiyayithola kwabakwaSassa akade bengacacisi ukuthi ngizoyithola noma cha. Babethe angivule icala bathi bazophenya. Uma sekungenelele Isolezwe banginika ithemba lokuthi imali ngizoyithola. Ngikhathazekile ngokuthi ongiqolile usazoqola abanye ngoba angitshelwanga ukuthi utholakele noma kwenzenjani. AbakwaSassa abangazisanga ukuthi uphenyo lwabo luhamba kanjani,” kusho uNkk Simelani.
Isolezwe lizamile ukuthola imiphumela yophenyo kwabakwaSassa kodwa kuze kwashaya isikhathi sokushicilela bengaphendulanga.
Begcina ukukhuluma neSolezwe ngo-Okthoba 16 babethe uphenyo lwabo lusesigabeni esibucayi abakwazi ukutshela intatheli okuqhubekayo kuzothi uma seluphothuliwe bazise uNkk Simelani.