Bavulwe amehlo esithangamini
UPHAMBENE nomthetho umkhuba wezinkampani ezishintsha usuku lokubamba imali kwi-akhawunti yokweletayo ngaphandle kokuvumelana naye.
Lokhu kushiwo nguMnuz Tim Masela oyiNhloko yeNational Payment System kwaSouth African Reserve Bank (SARB).
UMasela ukusho lokhu engxoxweni ekhethekile neSolezwe nephini lakhe uNkk Nomwelase Skejana emuva kwesithangami sokufundisa ngezimali ebesihlelwe yiSolezwe ngempelasonto.
UMasela uthe njengoba sekusondele amaholidi kaKhisimusi, ziningi izinselelo ezizobhekana namakhasimende.
Kulesi sithangami ebesigxile ekubanjweni kwamaDebit Order ngokungemthetho, abantu bakhale ngokuthi uma kungamaholidi izinkampani zishintsha izinsuku ezibamba ngazo imali kumakhasimende.
“Akukho emthethweni ukuzibambela iDebit Order ngosuku okungavunyelwananga ngalo. Kumele kube usuku okwavunyelwana ngalo ngoba uma bezibambela kungagcina umuntu enegama elibi,” echaza.
Enaba ngalokhu uNkk Skejana uthe ezinye izinkampani ziyawathumela amaSMS kumakhasimende uma kuzoshintsha usuku lweDebit Order. Ukhale ngokuthi amanye amakhasimende awawanaki amaSMS futhi angawuphenduli bese ibhange nezinkampani bayazibambela.”
Mayelana nezinye izinkinga ezijwayele ukwanda ngamaholidi kaKhisimusi, uNkk Skejana ubale ukuqolwa kwabantu ngamaselula njengoba abanye besebenzisa iCellphone Banking. “Njengoba kusondele uKhisimusi kuzokwanda nokuqhamuka kwamaDebit Order angagunyaziwe. Kubalulekile ukuthi umuntu avikele yonke imininingwane yakhe ayigcine kumaselula. Sekukhona nobugebengu obenzeka uma umuntu engene kuWiFi yamahhala. Akumele abantu bangene kuma-App anemininingwane yasebhange uma kuneWiFi yamahhala ngoba yilapho imali yebiwa khona,” kuchaza uNkk Skejana.
Okunye okube yizikhalo kulesi sithangami ukuthushuka kwamaDebit Order anemali engaphansi kukaR100.
Ababanjelwa lezi zimali bathi kuthatha isikhathi ukubona kwi-akhawunti ngoba neselula ayibiki ngeSMS uma kuhambe imali encane.
UMasela uthe uzokhuluma nososeshini wamabhange ukuwaphoqa ukuthi aziveze nezimali ezingaphansi kukaR100. Ugcizelele nokuthi ukufunda isitatimende sasebhange zinyanga zonke kuyasiza ukubona uma kuneDebit Order engagunyaziwe.
Ukhuthaze amakhasimende ukuthi avule amacala uma ebanjelwa amaDebit Order ngokungemthetho ukuze bathathelwe izinyathelo abathintekayo.
Uthe asebebanjiwe bafakwa emabhukwini amabi bese bekhokhiswa nenhlawulo.
Ukhuze nomkhuba wamabhange wokudlulisa imininingwane yekhasimende ngaphandle kwemvume yalo.
UNksz Noluthando Ngubane osemkhakheni wezokukhangisa kwiSolezwe, ubonge ukubambisana nabeSARB ukufundisa abantu ngezimali, wanxenxa nabafundi bephephandaba ukuthi baqhubeke nokuthamela lezi zithangami.
Abafundi beSolezwe bahlomule nangemiklomelo yokulala ehhotela eSibaya.