Idinga ukusukunyelwa eyezinkinga ezibikwa kwezezempilo
UMA kukhulunywa ngezikhungo zezempilo amehlo ajwayele ukuhlala kwezikahulumeni. Kuvame ukukhalwa ngazo ngokungabi sesimeni esihle nokungakwazi ukusiza iziguli ngendlela esezingeni elifanele.
Nabasebenzi bazo bakhala ngokugcwala kakhulu kuzo nokwenza babe nomsebenzi ongaphezu kwamandla abo.
Esinye sezigameko esibike ngazo ezifakazela lokhu ngesesibhedlela saseThekwini iKing Dinuzulu, ezinye iziguli zaso ezikhala ngokuthi ziphindiselwe emuva ngoba kuthiwa kushoda abasebenzi okubalwa kubo nodokotela.
Ngenxa yomthamo omkhulu wabantu abahambela izikhungo zezempilo zikahulumeni nokufuduka kwabasebenzi, izinkinga zilokhu ziqonga.
Ezinye zalezi zinkinga kuba ngamaphutha agcina eseholele ekutheni kuboshwe uMnyango wezeMpilo ngamacala obudedengu.
Kamuva kuze kwavela ukuthi uMnyango wezeMpilo ubhekene namacala obudedengu adinga ukukhokhelwa uR17.5 billion.
UNgqongqoshe woMnyango wezeMpilo kuzwelonke, uDkt Aaron Motsoaledi, wezwakalisa ukukhathazeka ngalesi simo.
Ukhathazeka kufanele ungqongqoshe ngoba inkulu kabi le mali nokusho ukuthi maningi amaphutha abengagwemeka umnyango oboshelwa wona.
Okunye okukhathazayo yimiphumela yocwaningo olusanda kwenziwa yiStellenbosch University ngezibhedlela ezizimele.
Umbiko wocwaningo uveza ukuthi akumaphutha kuyafiwa nasezibhedlela ezizimele yize kubukeka sengathi enzeka kakhulu ezibhedlela zikahulumeni.
Kuvela ukuthi amaphutha enziwa ngabahlengikazi nodokotela aholela ekutheni iziguli zidinge ukuhlinzwa, ezinye zikhubazeke kube khona nezishonayo.
Lesi simo siveza ukuthi liyehla izinga lokunakekelwa kweziguli ezikhungweni zezempilo, kungabe ezikahulumeni noma ezizimele.
Akumele izitshwe le nkinga ekubeni kukhona izikhungo ezenza imali ngokubeka impilo yeziguli engozini.