Ikhombise ubuhlathi iZimdonso ngokufudunyezwa kwe-Asiphelelanga
MHLELI: Ngicela ungibambele ngibenge. Okungisusa phansi okwenziwe ngabasakazi boKhozi FM ohlelweni uSigiya Ngengoma. ngoNovemba 3 kwephezulu. UZimdollar udlale izwi eliqoshiwe leGcokam’elisha lapho babekhuluma nalo liqinisekisa ukuthi ingoma esuse umsindo kaVusi Nova bazoyifudumeza ukuze kubalwe nabaculi bakamaskandi asebadlula.
Okufike kwashayisa amakhala uMaBiyela le “clip” uyidlale cishe kathathu ngaphambi kokuthi adlale ingoma kaMthandeni noVusi Nova nokungesiyo le elindwe ngabomvu.
Uyidlala nje akazibekile phansi ulokhu eshilo ethi ucela abantu belalelisise uMthandeni ukuthi uthini nohleko oluncane.
Okushayise ngamahloni nokuveza ubuhlathi kulaba basakazi nomdidiyeli ngingamshiyi ngaphandle, le ngoma bayitholile bayidlala, uma bezwa ukuthi akusiyo le elindwe ngabomvu kungani bengathintanga uMthandeni bambuze njengoba benza ngempelasonto edlule?
Lo obanike le ngoma bebengambuzi ngani ukuthi iphi le elindwe ngabomvu ukuze bengene emsakazweni sebenolwazi oluphelele?
Ohlelweni iTop 20 olulandela uSigiya Ngengoma kuwo lo msakazo osukwini olufanayo bavele babachayisa babuneka obala ubuhlathi beZimdonso njengoba beteketiswa kanjalo bashayela uVusi Nova bambuza ngale ngoma esithe yadedelwa ekubeni kulindwe i-Asiphelelanga wakucacisa ukuthi iyeza leyo ngoma ekupheleni konyaka noma ekuqaleni konyaka omusha, kwaba ukuphela komsindo njalo.
Sengiphetha nje ngiyafisa ukwazi izinhloso zika zikaMaBiyela ngesenzo sakhe. Ngethembe nezinhlamba esezithe zaqala phansi ezibhekiswe kuVusi Nova nakuMthandeni ziyamjabulisa, giya MaBiyela. Mbhoboze A Goqo ENQUTHU