Ongoti bacacisa ngezifungo zomshado
UBE sematheni umshado kaMnuz Linda Mthethwa waseNtuzuma obeshadelwa nguNkk Tiny Mthethwa muva nje, oqophisane nomfundisi ngesikhathi befungiswa.
UMthethwa ubelwa nokuthi ngeke avume ukuthi bayohlukaniswa ukufa nomkakhe njengoba ethe ngokwakhe ukungaziphathi kahle kuphela okuyobahlukanisa.
Yize uMthethwa ethuse abaningi ngalesi senzo, abanye abebephawula ngomshado wakhe ezinkundleni zokuxhumana bathe bayameseka. Bathe hleze sekuyisikhathi sokuthi zibuyekezwe izifungo zomshado ngoba zibonakala zingasasebenzi esikhathini samanje.
Ukwanda kwezibalo zabadivosayo kwenza ukuthi kubonakale sengathi azisenasidingo izifungo zomshado ngoba ziyaphulwa.
Lezi zifungo zomshado ezenziwa emshadweni omhlophe wamakholwa, zishiwo abashadayo belandela amazwi kamfundisi.
Ezinye zazo zigcizelela ukuthi abashadayo bazothandana ebuhleni nasebubini, bempofu noma becebile, bahloniphane futhi bajabulisane njengokomthetho kaNkulunkulu. Ekugcineni kwezifungo bazibophezela ekutheni bayohlukaniswa ukufa.
U-Apostle Dibanisa Khumalo weWorld Shakers Ministries ongumeluleki wezothando nemishado, uyavuma ukuthi ikhona inselelo ngezifungo ngenxa yokwenzeka emishadweni yamanje.
“Izifungo zomshado azikho eBhayibhelini kodwa zaqala kwiChurch of England zifakwe nasencwadini yebandla yomthandazo. Isifungo esihlobene neBhayibheli yilapho owesifazane kuthiwa akathobele umyeni. Ngokuhamba kwesikhathi abanye abefundisi bazenzele ezabo izifungo, ezinye bazimatanise neBhayibheli,” echaza.
Ulinganise ngesifungo esithi: “Ngiyathembisa ukuzithoba nokuhlonipha njengoba ibandla lihlonipha uKristu njengenhloko.”
UKhumalo uthe akunankinga uma abantu bezakhela ezabo izifungo, waphakamisa ukuthi bakhulume nozobashadisa ukuze bazibophezele sebezazi izifungo.
Oyisazi samasiko uMnuz Madoda Zungu uthe ngokwesintu emgcagcweni zikhona izifungo kodwa zehlukile kunalezo ezenziwa esontweni. Uveze ukuthi zihluke ngokuthi azigxilile emazwini kodwa zikhonjiswa ngokwenza.
Ulinganise ngokuthi uma kusesigcawini iphoyisa lenkosi elishadisayo liyabuza kumakoti ukuthi: “Uyamthanda na?”
Lokhu kulandelwa ukuthi umakoti ayoguqa phambi kwephoyisa andlale isicephu, athe nalokhu kuyisifungo.
“Uma umakoti esevumile iphoyisa lenkosi liyagiya, kulandele nomkhwenyana agiye bese umakoti eyagqashiya. Umakoti ugqashiya aze ayoshayisa ngenqulu umkhwenyana wakhe, okusuke kuyisifungo sokuthi sebehlanganisiwe,” echaza.
UZungu uthe ngisho inkomo ehlatshwayo nenyongo yokuthela umakoti kuyisifungo sokuthi sebehlanganiswe ngokusemthethweni.