UFadlu uxwayisa abadlali bakhe ngeHighlands
BADONSWE ngendlebe ukuba bangalokothi bayizele ngobuso iHighlands Park abadlali beMaritzburg United njengoba bezobhekana nayo emdlalweni omqoka wokubanga amaphuzu we-Absa Premiership ngoLwesihlanu ngo-8 ebusuku eHarry Gwala Stadium, eMgungundlovu.
Lesi sexwayiso esishubile siphume emlonyeni kaFadlu Davids oyinhloko yabaqeqeshi kwiTeam of Choice lapho ebekhalima khona abadlali bakhe njengoba bezobhekana neqembu abasanda kulijikela njengotshwala esiswini belikhipha ngaphandle kweTelkom Knockout. Kulo mdlalo obuseHarry Gwala emasontweni amabili edlule iHighlands Park ihambe phambili cishe wonke umdlalo kodwa ngemizuzu yokugcina ezikaDavids zadumisa enethini amagoli amabili okuyiwona ezigcine zinqobe ngawo. Lokhu uDavids ukubona kungaba isikhinsi ngoba unovalo lokuthi abadlali bakhe bazozithambisa ngoba bebuswa ukuthi bazokwazi ukukhuphula igiya uma sekufanele. “Lokhu kungaba enkulu inkinga ngoba kwakhona lokhu kubuya esikhuluma ngakho kwiTelkom Knockout bekuphelezelwa yinhlanhla. Sonke siyazi ukuthi inhlanhla ebholeni yinto esitshelekana ngayo sonke. Ngolunye usuku inhlanhla ingakuwe bese kuthi ngolunye ibe sezitheni zakho. Kungaba elikhulu ichilo uma abadlali bami bengakukhohlwa lokhu ngoba ayikho enye into esibhekene nayo manje ngaphandle kokuqala siqoqe amaphuzu azosibeka endaweni ehloniphekile kwi-log,” kusho uDavids.
Kuze kube yimanje iTeam of Choice imi kabi impela kwi-log lapho isaphumelele ukunqoba umdlalo owodwa kweyisishiyagalombili.
Lokhu kuyishiya isendaweni yesithathu uma usuka emsileni.
Ngaphezulu kwalokhu ezikaDavids zisaphumelele ukushaya amagoli amabili nje vo kule sizini kanti babhekene neqembu elibunjwe ngokhonkolo wasemuva.
“Sidlale kahle neBidvest Wits ikakhulukazi esiwombeni sesibili. Uma singahamba nale ndlela siye kwiHighlands Park nakanjani singawuthola umphumela oncomekayo. Kumele sifunde ukungavumi ukuthi amaqembu ashaye kuqala amagoli njengoba yenzile iHighlands koweTelkom. Sinethuba lokwengeza emaphuzwini amancane kakhulu esinawo futhi sidlalela ekhaya. Ngikhulekela ukuthi abadlali bami bangayithathi kancane iHighlands ngoba lokho kungaba enkulu inkinga kithina,” usonge kanje lo mqeqeshi.
Okubhekwe kulo mdlalo ukuthi iHighlands izomqalisa yini umdlalo umgadli wayo omusha uTendai Ndoro okunemibiko yokuthi usekulungele ukuqhulula amagoli okuyinto ayenze kusukela efikile lapha eNingizimu Afrika.