Kufufusa isiteleka sabadlali kwiPolokwane City
BANGASE bateleke abadlali bePolokwane City njengoba kuvela ukuthi iningi labo alikhokheliwe imali yokusayina futhi sekuphele iminyaka emibili.
Lokhu kuvezwe umengameli weSouth African Football Players Union (SAFPU), uThulaganyo Gaoshubelwe, oveze ukuthi sebezame amahlandla amaningi ukungenelela kulolu daba kodwa abaphathi beRise and Shine bayabaziba.
Ngokusho kukaGaoshubelwe, kunabadlali abangakhokhelwe imali yabo sekuphele amasizini amabili. Lesi sikhulu sithe sebezamile njengenyunyana ukuhlangana nabaphathi bePolokwane kodwa balokhu bethembise njalo ukuthi bazokhokha kungenzeki. “Ngokwejwayelekile imali yokusayinisa abadlali ikhokhwa ngo-Agasti noma ngoJanuwari. Kukhona abadlali osekuphele amasizini amabili bengayitholi imali yabo yokusayina. Lapha sibala abadlali abadlala eqenjini elikhulu, nakwiMultiChoice Diski Challenge (MDC). Isimo sesingaphezu kwethu manje, uma abadlali bekhetha ukungasebenzi, bengena emgwaqweni sizobeseka njengenyunyana ngoba sesikuzame konke kodwa lutho ukuthola imali yabo,” usho kanje uGaoshubelwe.
Elinye iqembu lePSL elibe nenkinga ecishe ifane, yiBloemfontein Celtic. Nakuba udaba lweSiwelele lungakapheli, kepha ukuxhumana kubonakala kukhona phakathi kwabadlali nezikhulu zeqembu njengoba besaqhubeka nokudlala.
“Inkinga enkulu ebhekene nePolokwane ukuthi abaphumeli obala, bachazele abadlali ngokuthi imali yabo bazoyithola nini (uma beyoyithola). Okubalulekile ezimeni ezifana nalesi ukuthi kube khona ukuxhumana okuhle, ukuhloniphana nokungabi nezimfihlo kwezikhulu. Uma lokhu kungenzeki, kudala ukuthi abadlali bahluthuke, kwazise ekugcineni basuke befuna imali yabo,” kuqhuba uGaoshubelwe.
Eqhubeka echaza uGaoshubelwe uthe lesi simo sesibami ethanyeni ngenxa yokuthi izikhulu zeRise and Shine zidlala umacashelana.
“Bangibuzile njengomengameli we-SAFPU ukuthi ngabe nginalo yini uhlu lwabadlali ababakweletayo. Ngibatshelile ukuthi uhlu nginalo kodwa ngabatshela ukuthi ngeke ngibathumelele ngoba ngikholelwa ekutheni kufanele engabe bayabazi abadlali okufanele engabe bayabakweleta. Ngisola ukuthi bebefuna ukuthola lolu luhlu, bese behlukumeza bonke abadlali abafuna imali yabo,” kusho uGaoshubelwe.
Leli phephandaba lixhumane noBernard Molekwa oyiphini lomqeqeshi kwiPolokwane ukuzwa ngalolu daba. Lixhumana nje noMolekwa, yingoba liyalelwe osebenza ehhovisi lePolokwane City (wesifazane), ukuba lixoxe naye ngoba nguyena owazi ngqo ngalolu daba.
“Mina angiholeli muntu, lolu udaba oluthinta ngqo usihlalo weqembu,” usho kanje uMolekwa ngomoya omuhle.
Usihlalo weqembu uJohnny Mogaladi akayinikanga ngisho ithuba intatheli ekhala ngokuxineka. Ucele ukuba ibuye imshayele ngesinye isikhathi.