Sincane isibalo sentsha ebhalisele ukuvota
IKHOMISHINI ebhekele ukhetho kuleli i-Independent Electoral Commission (IEC) ikhathazekile ngesibalo esincane sentsha ephakathi kuka-18 no-19 ebhalisele ukuvota.
I-IEC ithe le ntsha ingu-15.6% kuphela ebhalisele ukuvota kulandela ephakathi kuka-20 no-29 engu-56.7% ebhalisele ukuvota.
Lokhu kuvezwe nguMnuz Sy Mamabolo, isikhulu esiphezulu sekhomishini ekhuluma nabezindaba emahhovisi ale khomishini eCenturion.
“Umyalezo esizobe siwushumayeza ngukuthi intsha ibhalisele ukuvota. Sizobe sinxusa nalabo abazobe beqala ukuvota ukuthi babhalise,” kusho uMamabolo.
Umemezele ukuthi impelasonto yokugcina yokubhalisela ukuvota ingoJanuwari wonyaka ozayo.
“Sizovula ithuba lokuthi abantu babhalisele ukuvota ngoJanuwari 26 no-27, 2019. Sinxusa abantu ukuthi baphume bayobhalisela ukuvota, bafake nemininingwane yamakheli emqulwini wokuvota,” kusho uMamabolo.
I-IEC ithe abantu abadala bayavota abancane abangavoti.
“Bonke abantu bakuleli abano16 abanomazisi bangabhalisela ukuvota kodwa abazokwazi ukuvota abazoba neminyaka engu-18 ngosuku lokuvota. Akudingeki incwadi eqinsiekisa ikheli ukuze ubhalise kodwa kumele uchaze lapho uhlala khona uma ikheli lingekho ohlwini lwabantu bazovota,” kusho uMamabolo.
Uthe eminyakeni emibili edlule abafake amakheli angaphezulu kuka-13 million emqulwini wokuvota.
“Okwamanje abantu ababhalisele ukuvota bangu-26.1 million. Asebenamakheli bangu21.4% kusuka ku-8.4 million ngoMashi 2016.”
Uthe bazovula ithuba lokuthi babhalise labo abahlala ngaphandle kwakuleli wathi basazomemezela izinsuku zokubhalisela ukuvota. “Nabasemajele bazokwazi ukubhalisela ukuvota ngawo uJanuwari ukuze bakwazi ukuvota. Sinxusa imindeni yabo ukuthi isheshe ibahambisele omazisi ukuze bakwazi ukubhalisa.”
Uthe ihlandla lobuholi bezwe obukhona liphela ngoMeyi 6, 2019.
“Lokhu kusho ukuthi ukhetho kumele lubanjwe phakathi kukaMeyi 7 no-Agasti 5. UMengameli wathi ukhetho luzoba ngoMeyi ngonyaka ozayo kodwa usuku alukamenyezelwa kodwa luzoba kunoma imuphi uLwesithathu ngemuva komhlaka 7.”
Abavoti uthe bangaya kwiwebitse ye-IEC ethi: www. elections.org.za ukuzibheka ukuthi babhalise ukuvota kuphi.
Bangathumela neSMS enezinombolo zomazisi ku: 32810 ukuze bathole ukuthi babhalisephi.
Khonamanjalo uSihlalo wekhomishini uMnuz Glen Mashinini umemezele okhomishana abasha abaqokwe nguMengameli Cyril Ramaphosa. BangoDkt Nomsa Masuku, owayeyiphini lesikhulu esiphezulu se-Outreach, Mnuz Mosotho Moepya, owayeyisikhulu sale khomishini kanjalo neJaji Dhaya Pillay leNkantolo eNkulu yaKwaZulu-Natal. UKhomishana uNksz Janet Love ungene kwesePhini likaSihlalo.
ObeyiPhini likaSihlalo uMnuz Terry Tselane ushiye kule Khomishini ngemuva kweminyaka engu-18.