IWits izongeza izindawo zokuhlala izitshudeni
I-26’10 South Architects neCorobrik (Pty) Ltd bamemezele ukuthi bazokwengeza izindawo zokuhlala izitshudeni ezibalelwa ku-150 eNyuvesi yaseWits ekupheleni kuka2019.
UMnyango weMfundo ePhakeme wamemezela ukuthi kushoda imibhede ewu-250 000.
“Sihlola uhlelo lokwengeza izindawo zokuhlala lapho zivele zikhona. Sizothuthukisa nezikhona enyuvesi,” kusho uMnuz Thorsten Deckler, we-26’10.
UDeckler uthe inyuvesi ibatshele ukuthi kumele indawo entsha yamukele izitshudeni eziningi, kusetshenziswe impahla engambi eqolo.
Ukushoda kwendawo yokuhlala yinkinga ebhekene nomhlaba wonke hhayi nje kuphela eNingizimu Afrika lapho imfundo ithathwa njengethuluzi lokunqoba indlala.
Ukwakhiwa kwalezi zindawo kuyindlela yokwandisa indawo yezitshudeni ezoba sezingeni kusetshenziswa izitini.
“Ukwandisa izindawo zokuhlala ezakhiwa ngabo1980 kusinika ugqozi ngoba sifuna ukuhlola uhlelo lwethu ezindaweni eziningi,” kusho uDeckler.
Minyaka yonke kuhlale kuneziteleka zezitshudeni cishe kuzona zonke izikhungo zemfundo ephakeme ngenxa yokushoda kwezindawo zokuhlala.
Izikhungo ziphoqeleka ukuthi ziqashele izitshudeni izindawo zokuhlala emadolobheni ngoba izikhungo eziningi azinazo izindawo ezenele zokuhlalisa zonke izitshudeni.
Emadolobheni izitshudeni zijwayele ukukhala ngokuthi izindawo ezihlala kuzo azikho ezingeni lokuhlala abantu abafundayo.
Izikhungo zike zizame ukushintshela izitshudeni kwezinye izindawo zokuhlala.