Osaziwayo kwethulwa amabhasi
AKHUNGWE osaziwayo izolo amabhasi amasha abizwa ngoRicksha, abethulwa uMasipala weTheku njengengxenye yokugqugquzela ezokuvakasha.
Lawa mabhasi amabili adle uR17 million azotetemukisa izivakashi okulindeleke ukuthi zitheleke eThekwini njengoba kuzoqala amaholidi kaKhisimusi.
Izolo osaziwayo baseThekwini nabangaphandle kwesifundazwe bagibele lawa mabhasi okokuqala, bavakashela ngawo izindawo ezaziwa ngokuheha izivakashi. Lawa mabhasi avuleke ukhakhayi athwala abantu abangu-44 lilinye kanti kukhona nomculo phakathi. Kulabo saziwayo abawakhungile bekukhona umlingisi uNomzamo Mbatha obephethe uhlelo, uCassper Nyovest ongumculi we-hip hop ozoba nomcimbi obizwa ngeFill Up Moses Mabhida ngoDisemba. Bekunosaziwayo abaziwa ngokwenza imicimbi eThekwini okubalwa uZanele Mbokazi, DJ Sox, Wanita Ngcobo, Mdu Ngcobo nabanye. Bekukhona neqembu leRugby lamaSharks, AmaZulu FC neLadysmith Black Mambazo.
IMeya yeTheku uNkk Zandile Gumede ithe labo saziwayo nabahleli bemicimbi bangamanxusa ngoba baheha izivakashi. Igxeke abakhulumayo uma kukhishwa imali kuxhaswa imicimbi, ithe alikho idolobha elingaphila ngaphandle kwayo.
“Siyagxekwa uma sikhipha imali kuthiwa sidlala ngayo. Uma sixhasa uZanele Mbokazi ngemali asixhasi yena kodwa sixhasa uhlelo alwenzayo ngoba luzoletha izivakashi, kugcwale namahhotela. Ngeke siye ndawo uma imali ingatshalwa kwezokuvakasha ngoba abantu bathanda ukuvakasha lapho kumnandi khona,” kusho yena.
UNkk Gumede uthe bafuna ukubeka eqhulwini ezokuvakasha ukuze kuthuthuke umnotho weTheku nesifundazwe. Uthe isifundazwe siheha izivakashi ezingu-1.3 million ngonyaka, iTheku elinesandla kulokhu.
Unxuse abantu ukuthi bayeseke yonke imicimbi ezoba khona ngamaholidi ukuze bakhuphule umnotho. Amabhasi ethulwe izolo kuthiwe maduze azolandelwa amanye amabili.
UMnuz Sbu Zondi oyimenenja ophikweni lwezokuvakasha kumasipala, uthe iTheku selikulungele ukwamukela izivakashi ngamaholidi.
UCassper uthe uyajabula ukuthi uzokwenza umcimbi eThekwini njengoba eseyenzile nakwamanye amadolobha. Uthe uhlonipha isicelo sabalandeli bakhe abebelokhu bebuza ukuthi uzowenza nini umcimbi eThekwini.