Ikhaya libalulekile noSerero ukubonile lokho wazehlisa
ISIFUNDO okumele sitholakale kokwenzeke kuThulani Serero neBafana Bafana esokuthi ayikho indawo ebalulekile ukwedlula ikhaya. USerero umenyezelwe ngoMsombuluko nabanye abadlali beBafana abazobhekana neNigeria emdlalweni obalulekile wokuhlungela i-Africa Cup of Nations (Afcon) ngoNovemba 17. Lo mdlali, ogijima kwiVitesse yaseNetherlands, wazidingisa yena eqenjini lesizwe ngonyaka odlule ngaphambi komdlalo wokuhlungela iNdebe yoMhlaba neSenegal.
USerero wabalula ukuthi ngeke eze ekhempini yeBafana Bafana uma umqeqeshi uStuart Baxter engaqinisekisi ukuthi uzomdlalisa. Wayegagamela kakhulu uSerero futhi lokhu ayekusho kwakuwukubukela phansi abanye abadlali beBafana. Kungani kumele kuqinisekiswe kumdlali oyedwa ukuthi uzodlala nakanjani ngaphambi kokuthi athathe indiza eze ekhempini yezwe lakhe?
Nokho ubonile uSerero ukuthi wanhlanhlatha njengoba kuthiwa uyena oshayele ucingo iSouth African Football Association (Safa) wayitshela ukuthi usafuna ukudlalela iqembu lesizwe ngoba wenza kahle eqenjini lakhe. Kuzokhumbuleka ukuthi iSafa yatshela lo mdlali ukuthi ngeke aphinde abizwe kwelesizwe ngoba ukubukela phansi ukumela izwe lakhe.
Kuyaziwa ukuthi akumnandi ukuhlala ebhentshini ube usuke eqenjini lakho phesheya wathatha indiza ngenhloso yokuzomela izwe lakho. Nokho abadlali kumele bazi ukuthi ukubizwa nje kukodwa kuyinto enkulu futhi eqenjini lesizwe kumele bazimisele bangavele nje balindele ukuthi bazodlala ngoba nakhu begijima emaqenjini aphesheya.
Kuyajabulisa ukuthi uBaxter uqale waqinisekisa ukuthi uSerero akasenayo yini imibandela ngaphambi kokuthi amfake eqenjini lesizwe. Abadingeki abadlali abafuna ukuncengwa nokutotoswa ukuze bezomela izwe labo. Kuyacaca ukuthi uSerero ubonile ukuthi maningi amathuba okuthi iBafana iye kwi-Afcon ezodlalwa ngoJuni eCameroon, wase ezincengela.
Akusenani kumele axolelwe kodwa abadlali kumele bazi ukuthi noma bangahola izindodla zemali phesheya kodwa kubalulekile ukugqoka imibala yezwe lakho. Ayikho into ebaluleke njengekhaya noma ungahamba ujubalale kumaphi amazwe.