Akuliwe nokuhlukunyezwa kwanoma wubani
MHLELI: NgoNovemba 1-2 bekunomcimbi okwakumenywe kuwona owesifazane owabulala indoda yakhe.Wagwetshwa udilikajele ngesenzo sakhe kodwa kulo mcimbi ubeyisimenywa esiqavile. Uma ekhuluma uthi kwakufanele abulale indoda ngoba yayimhlukumeza. Kulungile yini kanti uma kubulawa amadoda? Ngifisa ongangiphendula.
Akuqali. Ngithi ngonyaka odlule, uma ngingaphosisi, emsakazweni uKhozi FM, ohlelweni lukaDudu ‘Lady D’ Khoza woKhozi FM, kwakukhona abesifazane ababebulale amadoda abadonsa izigwebo ezinde ejele lase Westville. Ohlelweni babechaza ukuthi amadoda babewabulalelani. Bathi ayebahlukumeza.
UDudu wayekhombisa naye ukuthi uzwelana nabo. Ngabe kwamukelekile yini ukuthi amakhosikazi abulale amadoda? Yinini la kuke kuthiwe indoda bekufanele ibulawe owesifazane?
Khulumani ma-Afrika amahle. Kuyaxaka-ke uma noMengameli wezwe uMnuz Cyril Ramaphosa umfica kuleyo micimbi angaphawuli lutho umuntu ebe ezincoma phambi kwakhe ethi wabulala indoda kube sengathi lokho kuyinto enhle nje. Kuthini ezihlotsheni zababulawa uma zizwa abantu bekhuluma ngento ebuhlungu kangaka?
Mina ngithi asilwe nokuhlukunyezwa kwabantu bonke singakhethi bulili.
Ngithi mina bangaki abantu besilisa ababulawa ngoba kushintshwa amasheke? Ngicela ukubuza ukuthi sikhona yini isiboshwa esike sikhulume iqiniso, kungaba ezesilisa noma ezesifazane? Uma zahlukumeza, zingabahlukumezi nje kwaphela.
Asisukume silwe nokuhlukunyezwa kwabantu ezweni.