‘Masizilalele eziklelisa amazwe ngokomnotho’
IPHINI lomphathi webhange loMbuso iSouth African Reserve Bank, uMnuz Francois Groepe, lithe iNingizimu Afrika ayikwazi ukuziba izinhlangano eziklelisa amazwe ngokomnotho ngenxa yokuthi elakuleli liboleke imali emazweni angaphandle.
UGroepe ubekhuluma emhlanganweni weBhange loMbuso nomphakathi obuseHilton Hotel ngoLwesithathu ebusuku.
“INingizimu Afrika inesikweletu esikhulu ngenxa yokuboleka imali emazweni aphesheya kwezilwandle. Uma uboleka emazweni aphesheya kufanele ukulalele okushiwo yizinhlangano eziklelisa amazwe ngomnotho ngoba uma ukuziba umnotho wakho uzowa. Bheka izinto ezenzeka eZimbabwe naseVenezuela. Ngakho kubalulekile ukuthi sizilalele lezi zinhlangano,” kusho uGroepe.
Uthe iBhange loMbuso likhona ukuqinisekisa ukuthi amandla emali yaseNingizimu Afrika awapheli ngoba iRandi liyahlonishwa emhlabeni yize umnotho ungakhuli ngendlela efanele.
UNkk Pamela Mjandaba oyisazi somnotho eBhange loMbuso uthe umnotho waseNingizimu Afrika ngeke ukhule kahle kulo nyaka nangonyaka ozayo kodwa umehluko uzobonakala ngo-2020 lapho kulindeleke ukuthi ukhule ngo-2%.
Uthe lokhu kwenziwa wukuthi umnotho emhlabeni jikelele awukhuli kahle kodwa amazwe amakhulu iNingizimu Afrika ebukela kuwona abale i-United States (US), Europe neJapan, azokhula ngokomnotho. Ubalule ukuthi umnotho wase-US uzokhula ngo-2.9% ngasekupheleni konyaka, owase-Europe ngo2.0% owaseJapan ukhule ngo-1.1%.
Uthe akuyona iNingizimu Afrika yodwa ebhekene nezingqinamba kodwa namanye amazwe anomnotho osathuthuka asenkingeni.
Nakuba iNingizimu Afrika ibhekene nezingqinamba ngomnotho ongakhuli nokuntenga kweRandi kodwa umnotho wayo awumubi kakhulu uma uqhathaniswa nowaseArgentina, Turkey nakwamanye amazwe lapho imali yakhona isingasenawo amandla.
UDkt Rashad Cassim oyiNhloko yezocwaningo eBhange loMbuso uthe inzalo ekhokhwa ngamabhange uma eboleke imali eBhange loMbuso ayikezukunyuka okwamanje izohlala ku-6.5% ngenxa yokuthi abafuni ukuhlukumeza abampofu.
Ubalule ukuthi abampofu abanayo imali eningi abayilondoloze ngezindlela ezehlukene abale kuzo amasheya nokunye kodwa banemizi futhi bayalondoloza nasemabhange.
“Uma sinyusa imali mboleko kufana nokuthi sandisa umthwalo emahlombe abantu. Asifuni ukwenza lokhu kodwa inhloso yethu wukugqugquzela ukukhula komnotho ukuze kudaleke amathuba omsebenzi. Kufanele uhulumeni aqinisekise ukuthi ubopha izifociya ngoba umnotho awukhuli kahle futhi sandile nesibalo sabaswele umsebenzi,” kusho uCassim.
Uthe kusukela ngoJanuwari wonyaka odlule imali mboleko bayehlise ngo-50 basis points futhi bazoqhubeka nokuqapha isimo ngeso lokhozi.
Mayelana nokuthi iBhange loMbuso libuye lisho okungesikho ngokukhula komnotho, uCassim uthe ekuqaleni konyaka nabo babecabanga ukuthi ukungena kukaRamaphosa kuzokhulisa umnotho kodwa ngebhadi akwenzekanga ngoba abantu abafuni izithembiso kuphela kodwa bafuna ukubona kufezeka lezo zithembiso.