Akukho okuzomthiba ekushayeni amagoli
UBADLISELA ogageni abadlali base-Afrika abahlonishwa umhlaba wonke ngokushaya amagoli umgadli weBafana Bafana ozinze eFrance, uLebohang Mothiba.
UMothiba useshaye amagoli ayisikhombisa selokhu kuqale isizini okumbeka endaweni yesibili kumaligi amahlanu aphezulu e-Europe.
Njengoba sekunezinyanga ezine kuqale isizini emaqenjini akumaligi amahlanu amakhulu e-Europe, abadlali base-Afrika abazibekile phansi ngokushaya amagoli.
Okuqaphelekayo nokho wukuthi uMothiba unerekhodi elingcono kunelikaSadio Mane noMohamed Salah bobabili abadlalela iLiverpool egijima kwiEnglish Premiership.
UMothiba, osesikwatini seBafana esizobhekana neNigeria kowokuhlungela i-Africa Cup of Nations (Afcon) engonyaka ozayo, uphinde wengeza emagolini akhe asewashaye kwiStrasbourg nakwiLille, aqale kuyona isizini kodwa wadayiswa ngaphambi kokuvaleka kwewindi lokushintshana ngabadlali. Aseyisikhombisa amagoli esewonke awashaye kwiLeague 1.
Isibalo simbeka endaweni efanayo nonyazi lomgadli we-Arsenal yase-England, uPierre-Emerick Aubameyang waseGabon. Eqhulwini kuhleli uNicolas Pepe weLille edlala khona eFrance. Useshaye amagoli ayisishiyagalombili selokhu isizini iqalile.
Ukushaya kwakhe amagoli sekumenze wafunwa yiFC Barcelona yaseSpain.
UKevin-Prince Boateng waseGhana odlalela iSassuolo yase-Italy useshaye amagoli amane bese kuthi uzakwabo kaMothiba kwiStrasbourg, uNuno Da Costa, waseCape Verde, naye useyibhakuzise amahlandla amane inethi kule sizini.
Omunye umdlali oqavile e-Afrika olandela ngemuva kuMothiba, uReyad Mahrez, wase-Algeria, odlalela ompetha base-England, iManchester City. Useshaye amane kanti uMo Salah oshaye inqwaba ngesizini edlule okuze kwasiza iLiverpool yaseEngland kowamanqamu we-Uefa Champions League, usaphumelele ukuwabona kahlanu lapho egxunyekwe ngakhona amapali.
UWahbi Kazri waseTunisia odlalela iSaint Ettiene yakhona eFrance unamagoli amahlanu. Onayisithupha uMane ohlale njalo eyihola njengesibani iLiverpool neSenegal.
UFrancois Komane weBordeaux edlala khona eFrance neGuinea eqenjini lesizwe ubambene noMothiba emagolini ayisikhombisa okuyisibalo esifanayo naku-Aubameyang. UPepe uhamba yedwa ngayisishiyagalombili.