Amaqola athembisa amavawusha
ISOUTH African Social Security Agency (Sassa) idonse abantu ngendlebe ukuthi bangawalaleli amaqola athi kunamavawusha egilosa akhishwa yiyona iSassa.
Esitatimendeni esithunyelwe kwabezindaba, uMnuz Paseka Letsatsi ophethe ezokuxhumana kule nhlangano kuzwelonke, uthe ziningi izingcingo abazithola kubantu bebuza ngamavawusha egilosa azophiwa abangasebenzi entengo kaR2 500.
Ucele umphakathi ukuthi ungabalaleli abasho lokhu futhi unganiki muntu omazisi nezincwadi zalapho behlala khona.
Uthe lolu daba sebeludlulisele emaphoyiseni nakwiNational Credit Regulator ukuze kuphenywe ukuthi wobani abasabalalisa lo mlayezo.
Bagqugquzele abantu ukuthi babhalisele amakhadi amasha ezibonelelo zikahulumeni ngoba ngeke asebenze amadala ngoJanuwari.
ISassa ibhale lokhu kwiwebsite yayo iveza ukuthi abantu kufanele benze isiqiniseko sokuthi sebenamakhadi amasha ngoDisemba 14 ukuze bangabi nenkinga uma sekuholwa ngoJanuwari.
Kule nyanga bawu-7 829 502 abahola izibonelelo zikahulumeni abazithole ePosini besebenzisa amakhadi amasha. AbakwaSassa baveze ukuthi bawu-600 000 abantu abangenawo amakhadi amasha okuhola. UNksz Nobuhle Njapha obhekele ezokuxhumana ePosini KwaZulu-Natal uthe abantu kufanele babhalisele amakhadi amasha ePosini, baphathe omazisi babo ukuze bathole la makhadi.
Uthe kunezinhlelo eziyisipesheli ezenzelwe abangakwazi ukuya ePosini futhi abanezihlobo ezithola izibonelelo zikahulumeni. Abangeke bakwazi bangakwazi ukuya ePosini kufanele bashayele u-0800 60 10 11 ukuze benze izinhlelo zokuthi bavakashelwe emakhaya.
Uthe iPosi liyababhekela abantu abangathandi ukusebenzisa inombolo eyimfihlo uma behola isibonelelo, abafuna ukugingqa isithupha.
“Abantu abafuna ukuhola imali yabo ngalolu hlobo kufanele beze nomazisi babo ukuze bagingqiswe izithupha bese beholelwa izibonelelo zabo. Ukusebenzisana kwePosi noSassa kubasizile abantu ngoba imali yabo ayisancozulwa yizinkampani ezingagunyaziwe kodwa bayithola iphelele,” kusho uNksz Njapha.
Khonamanjalo Isolezwe libike ngoNkk Sylvia Simelani owathola ukuthi imali yakhe iholwe ngomunye umuntu okuthiwa wenze ikhadi elisha. UNkk Simelani uhole isibonelelo sakhe sale nyanga kodwa aqolwe sona asikabuyi.
Selokhu Isolezwe libhale lolu daba zilokhu zingenile izikhalo zabantu abathi izibonelelo zabo ziholwe ngabanye. AbakwaSassa bathi umphakathi uma wehlelwe yilezi zinkinga ubike emahhovisi aseduze akwaSassa ukuze kuphenywe.
Bathe umphakathi ungashayela u-0800 60 10 11 no-033 846 3400.