Luhamba kahle uphenyo ngeVBS

OKLEBE bathi luhamba kahle uphenyo lwabo ngokubhubhudlwa kwemali eVBS njengoba sekuthathwe izitatimende kofakazi abawu-65.

Lokhu kuvele ngesikhathi oKlebe bevele ePhalamende ukuyokhuluma ngodaba lokubhubhudlwa kwemali kuleli bhange.

NgoLwesithathu uMnuz Kuben Naidoo oyiPhini loMphathi weBhange loMbuso uveze ukuthi abantu ababetshale imali eVBS ngeke bayithole yonke imali yabo kodwa bazothola u-20 cents noma u-30 cents kwiRandi ababelifake kuleli bhange.

Bathe abathintekayo bangase babhekane namacala okushushumbisa imali.

Umphathi woKlebe u-Adv Jeffrey Lebeya uthe udaba lweVBS luphenywa ngamaphoyisa awu-10 awongoti emacaleni athinta imali.

Inhloko yoKlebe esabambile, uDkt Silas Ramaite, ithe ijube abashushisi abahlanu nezinye izikhulu zophiko olusebenza ngamacala emali (Asset Forfeiture Unit), kukhona nezikhulu zeFinancial Intelligence Centre.

URamaite uveze ukuthi ngeke akwazi ukudalula abantu abazoshushiswa okwamanje ngoba udaba lwaseVBS luwubugebengu obudlula ukukhwabanisa nokweba, lukhulu kakhulu.

Kuyimanje iBhange loMbuso lifake isicelo sokuthi kuvalwe iVBS ngoba ayinayo imali futhi aliboni ukuthi lingavuka uma lihlengwa. Isicelo sizolalelwa ngoLwesibili. I-ANC ne-EFF bafuna kuhlelwe iVBS futhi i-ANC ithe ibheka abatshalizimali ngoba leli bhange belisiza umphakathi wasemakhaya.