IZINKONDLO

Ngiphe Isizathu Ngiph’ isizathu mntanomuntu Zolo lokhu ubukhala Zolo lokhu ubuqalekisa Zolo lokhu ububalisa Zolo lokhu ubulangazelela Namanje kusenjalo. Ngiph’ isizathu sethemba Ubunswelaboya budlangile Sengiphenduke isigqila Isigqila sovalo Isigqila sokungethembi Ngingethemba kanjani? Ngiph’ isizathu ngane yakwethu Ubuthong’ angisabazi Kwahashaza, ngagxuma Kwadum’ inganono Ngoma khehle Kwangqongqozwa ngabanda. Ngiph’ isizathu mfowethu Kuyesinda kuyehlela Sengithuswa yisithunzi sami Ubumnyama sebuyisitha Sengingolindele noma yini Isizathu sisobala. Ngiph’ isizathu Akusekh’ okungokwami Into yami sekungeyomuntu Impela ilukhuni le ndaba Isilingen’ amagwababa echobana

Ayoyizeka le ndaba. - Gcwalisile Zulu-Kabanyane Ubothula mntanami

Noma amanqe esekuchutha uphila,

Esekushaya ulele edanyini legazi, Ubolwa ubheke phambili, Ubokhuluma ngezenzo esethi aqedile,

Kuyosabela impumelelo ikulamulele,

Ngomlomo; ubothula mntanami.

Sebenikela ngawe ungumhlatshelo, Bekhophoza bedliwa isazelo, Bekubuza izithakazelo bekubhuqa, Ubomamatheka ungevaka, Kuyophuma ilanga babukwe izwe,

Ngomlomo; ubothula mntanami.

Kuyokhala izingcingo beshintshana,

Bezenza bahle ezindlebeni zakho,

Bekutusa behlek’ inhlinini bekubhuqa,

Bephikisana nonembeza babo abazi iqiniso, Ngezenzo izwe liyokufakazela, Ngomlomo; ubothula mntanami.

Amaqhawe awakuhluleli ngokuwa kwakho,

Kepha ngokuvuka ngemuva kokuwa,

Amaqhawe awukuvumeli ukwehlulwa,

Ayanqoba kumbe afunde kuleyo mpi,

Awalw’ ezinkundleni zokuxhuman’okwamavaka,

Ngomlomo; ayathula mntanami. - Sipho Banda