Kusaphaka udaka kwiHilux Dakar
UKUBA bekuvezwa ukuthi imoto ngayinye idayisa kangakanani uma kukhishwa izibalo zokuthengwa kwezimoto, bekuzozicacela ukuthi iToyota Hilux Dakar ingenye yezimoto ezenza kahle kwaToyota.
Inkinga wukuthi izibalo zikhipha amagama kuphela. Kumane kuthiwe Hilux kungavezwa izinhlobo zayo ezehlukene.
IDakar ifike yaphenduka intandokazi selokhu yethuliwe ngoJuni. Lokhu kufakazelwa wukwanda kwayo emgwaqweni. Abantu bayithengiswa wukwehluka kwayo kunamanye amaHilux.
IDakar kugujwa ngayo impumelelo yeHilux eyakhiwa eNingizimu Afrika. Ingenye yezimoto ezihlanganyelayo emncintiswaneni weDakar Rally.
IDakar igqize ngengaphambili elehlukile kunamaHilux akhona. Ishaya nge-grille egolozile ye- trapezoidal, ikhanyisa ngamalambu eLED.Ngezansi inamalambu enkungu.
Nawo amalambu enkungu angamaLED. Abashayeli bangakhetha phakathi kweXtra noma iDouble Cab, esithole ithuba lokuyivivinya. Ishaya ngemibala ehlukene okukhona kuyo nomusha i-Inferno Orange Metallic engiwuthandayo ngenxa yokugqama kwawo. Thina kodwa sithole emhlophe, enhle nayo ngokufanayo. Ngemuva bayimboze ngoseyile, esikhenkeni bayibhixa ngokuyivikela ukuthi ingalimali uma ilayisha.
Ngaphakathi imnyama yonke indawo kusuka ezicabheni, kudashboard, okhakhayini kuyoshaya ezihlalweni zesikhumba.
Sekwashintsha ukuthi izimoto ezingamaveni kube ezokusebenza njengoba uma ungaphambili ungafunga ukuthi yimoto encane. I-infotainment system bayithuthukise ngokuyifaka iSatellite Navigation kodwa bebengayisethile kweyethu.
Ngaphandle kwalokho ineBluetooth, ifaka i-USB, idlala iCD/DVD endaweni lapho kuvela khona ingemuva uma uhlehla kanti iyi-touch screen. Baphinde bayigaxa i-instrument cluster entsha.
Isiteringi siyisikhumba futhi sinezinkinobho zokulawula umsakazo nokunye. ine-cruise control. Inenkinga yakudala yakwaToyota yokuthi uma ushintsha igiya lilokhu liphenduka.
Njengoba kuyimoto yomndeni nje, inendawo eziningi zokubeka impahla njengeziphuzo ngaphambili kwi dashboard, ezicabheni nangemuva kwegiya.
IDakar isebenzisa injini engu-2.8 GD-6. Le njini engu2.8 litre fourcylinder turbodiesel inamandla angu-130 kW netorque engu420 Nm kanti uyazishintshela amagiya ayisithupha. Uma ufaka igiya eliya emuva kumele uliphushe kakhulu eceleni. Bekubuye kugejeke kungene eliya phambili kodwa uma usujwayele ayibi khona inkinga.
Emgwaqweni iyazishibilikela nje, yize bebengenza kangcono ekutheni ithule futhi ibe ntofontofo njengezimbangi ezifana neNissan Navara, Mitsubishi Triton neMercedes-Benz X-Class.
Akusiyona imoto engakulalisa kalula ezintabeni ngoba iyi-4x4, uma usuxakeka uyenza ukuthi idonse ngawo wonke amasondo ishaye udaka ilubhekise eceleni.
Uma ihamba uyalibona uthi lukadizili lwehla. Ngebanga lika-100 km ihubuluze amalitha awu-9 ngesikhathi ngihamba ngayo.
Angibasoli abantu abayithengayo ngoba yimoto esezingeni futhi ongathembela kuyo. Nokuhamba ngayo nsuku zonke akuyona inkinga ngoba uma upaka iveza ingemva kwazise inekhamera.
Empeleni uma uthenga imoto enje uphelele ngoba uyakwazi ukuhamba ngokukhululeka nomndeni uphinde ube nesikhala esanele sempahla. Inani Hilux DC 2.8GD6 4X4 Dakar MT R601 100 Iphuma neservice plan yamasevisi ayisishiyagalolunye noma u-90 000km newarranty yeminyaka emithathu noma u-100 000 km.