Umsakazi wodumo useyinxusa lezimoto

Isolezwe - - EZEZIMOTO - THOKOZANI MBUNDA

UPHUMLANI Dube odume ngokuyibamba njengomsakazi eziteshini ekubalwa kuzo uKhozi FM, Gagasi FM, Vuma FM ne-East Coast Radio useyinxusa lezimoto zakwaHooper VW Durban.

Lokhu kuqinisekiswe isikhulu esiphezulu sale nkampani uDave Hooper.

UHooper uthe bese kuphele isikhathi eside bethungatha umuntu onentshisekelo yokusebenzela umphakathi njengoPhumlani.

“Ukuhlabana ngenxusa elikanje kwenza isifiso sethu sokusebenzisana nokuzifikela mathupha emphakathini sifezeke kalula ngoba uPhumlani ungumuntu wabantu,” kubeka uHooper.

Uqhube wathi abazisoli nakancane ngobudlelwano ababuqalile ingakho nakwinkontileka abayisayinile bengabhalanga ukuthi izophela nini.

Ephawula uPhumlani ngalolu daba uthe yena uthukile ethintwa inkampani ayihlonipha kangaka ngodaba lokuba yinxusa.

Uveze ukuthi konke asuke akwenza ezinkundleni zokuxhumana nabalandeli bakhe ubengazitsheli ukuthi bakhona abamlandelayo ngoba benezinhloso ezithile nokubona ungumutu onjani.

“Le nto yokusebenzisana nomphakathi bengiyiphusha kakhulu ezinkundleni zokuxhumana, ngenza nemicimbi yokubuyisela emphakathini, ngibuye ngethule nezinkulumo ezakhayo kanti ngilandelwa nayinkampani engaka ngingazi,” kusho uPhumlani.

Imoto enikwe uPhumlani yiVW Golf 7 yonyaka ka-2018.

Ingaphakathi layo lishaya ngezihlalo zesikhumba ezifudumalayo, Bluetooth, air-conditioner, inamagiya ayisithupha aya phambili, sun roof kagesi, amawindi kagesi nokunye okuningi.

ISIKHULU sakwaVWSA uMnuz Dabve Hooper sihalalisela uPhumlani Dube

Newspapers in Zulu

Newspapers from South Africa

© PressReader. All rights reserved.