Kulindwe imiphumela ngegciwane emaqandeni
UMKHANDLU weTheku uthi umphakathi ungatatazeli awulinde imiphumela ezocacisa ukuthi ngabe izakhamizi zakuleli dolobha ezigule ngemuva kokudla amaqanda, ziguliswe yisalmonella yini.
UMnuz Musawakhe Mayisela okhulumela uMasipala weTheku, uthe ngemuva kokuthi odokotela ababone abantu ababalelwa ku-20 ebebegula ngemuva kokudla amaqanda bakuqinisekisile ukuthi iziguli abazibonile ziguliswe yigciwane isalmonella. Ngenxa yalokhu umasipala uyaphenya ukuthi isalmonella okuyigciwane elitholakala ekudleni okungaphekiwe, belisemaqandeni yini nokuthi ngempela lezi zakhamuzi ziguliswe wukudla okunalo yini.
“Okwamanje abantu abehlise umoya, baqinisekise ukuthi bageza izandla uma bezothinta ukudla ngoba lesi sifo sisabalaliswa ukungahlanzeki. Ngiyethemba ukuthi lizophela isonto sesiyitholile imiphumela enemininingwane ephelele. Okwamanje bangaphezu kuka-20 abantu ababonwe ngodokotela ebebephalaza behlanjulukelwe nayizisu okungezinye zezimpawu ze-salmonella,” kusho uMayisela.
Kuphazamiseke umcintiswano wokupheka endaweni yokudlela, i-Old Town Italy, eMhlanga abebengenele umcintiswano bephalaza ngemuva kokudla ukudla okunye kwakho obekuneqanda.
AbakwaSpar obekuthengwe kubo amaqanda bathi basalinde imiphumela yocwaningo ezocacisa ukuthi ngabe amaqanda abo abenegciwane isalmonella ngempela yini. Okwamanje bathe amaqanda asazoqhubeka adayiswe, bazowakhipha uma bethola ukuthi anayo isalmonella.
UMnuz Rowan Holt wenkampani ekhiqiza iBarn Eggs ephakela izitolo zakwaSpar uthe uphenyo lwesikhashana luveza ukuthi leli gciwane alikho emaqandeni abo kodwa wathi bazobambisana nabenza ucwaningo.
UMnyango wezeMpilo esifundazweni uthe uzosiqapha isimo, kodwa ucwaningo lwenziwa uphiko lwezempilo lukaMasipala weTheku ngoba zonke lezi zigameko zenzeke eThekwini.