‘Abaphumele obala abahlukunyezwa emabandleni’
ABEFUNDISI besifazane bamahlelo ahlukene ezenkolo eThekwini banxuse abesifazane abahlukunyezwayo emabandleni ukuthi baphumele obala ukuze kuliwe nalesi sihlava.
Esithangamini nabezindaba eCity Hall eThekwini izolo, uNobhala wabefundisi besifazane uNkk Ziningi Jali okunguye obefunda isitatimende, uthe sekwanele ukuhlukunyezwa kwabesifazane, wengeza ngokuthi bafuna ukuthi bonke abagila imikhuba babhadle ejele.
“Siyakuqaphela ukuthi sekunabefundisi abaningi abagila imikhuba egameni lenkonzo okuyinto ethunaza umsebenzi kaNkulunkulu,” kusho uNkk Jali. Uthe abantu besifazane abahlukunyezwayo kufanele bangathuli ukuze unqandwe lo mkhuba odla lubi
“Abantu besifazane ikakhulukazi izingane zamantombazane zisatshiswa ngokuthi zizoqalekiswa zilandelwe ngamadimoni uma zibika ngokuhlukunyezwa, umuntu ongakakhuli ngokomoya angasaba ngempela uma ezwa lokho angabe esakhuluma ngokuhlukunyezwa kwakhe,” kusho uNkk Jali.
Uthe abefundisi abagila imikhuba basebenzela ubumnyama.“Iningi labo lisungula amabandla ngoba lifuna ukwenza imali liphinde lithokozise imizwa yabo ngokuhlukumeza abesifazane,” kusho uNkk Jali.
Uthe bengabafundisi besifazane bayameseka uNksz Cheryl Zondi ongufakazi wokuqala emacaleni okudlwengula abhekene noMfundisi Tim Omotoso waseNigeria.
“Ubufakazi obethulwe nguNksz Zondi sebungamyisa u-Omotoso ejele,” kusho uNkk Jali.
Kulesi sithangami sabezindaba kukhona nomunye umzalwane ocele ukuthi angadalulwa ophumele obala wathi naye ubehlukunyezwa ngumyeni wakhe ongumfundisi, waze waphuma emshadweni.
“Ngize ngaphoqeleka ukuthi ngiphume nasebandleni ngenxa yokuhlukunyezwa obekwenziwa kumina,” kusho lo mzalwane.
Kuphele isithangami sabezindaba kwabe sekuba nenkonzo ngaphandle kwaseCity Hall.