‘Uklinye’ intombi wabaleka namakhadi
USAGCWELE amathafa owesilisa wokufika kuleli osolwa ngokubulala intombi yakhe eNquthu maqede wabaleka nekhadi lakwaSassa lokuholela izingane zayo yesibonelelo sikahulumeni.
Sekuphele isonto enyamalele ngemuva kwezinsolo zokubulala intombi yakhe, uNksz Khanyisile Mchunu (37) etholwe iklinywe ngentambo endaweni abebehlala kuyo nezingane kwaLuvisi eNquthu. Okhulumela amaphoyisa KwaZulu-Natal, uColonel Thembeka Mbele, uthe akekho oboshiwe ngokubulawa kukaNksz Mchunu. Isoka kuthiwa like labonakala lihamba noNksz Mchunu beyohlasela esikoleni iLuvisi Primary, bashaya uthisha wengane yabo eyenza uGrade 3 bemsola ngokuyithethisa.
Ngemuva kwalokho abazali babize umhlangano ophuthumayo obekumele kuvele kuwo uNksz Mchunu nesoka lakhe ukuze baziphendulele futhi bachaze ngalesi sigameko.
Omunye wabazali ocele ukungadalulwa uthe umhlangano ubuzoba kusasa.
“Sishaqekile ngokudlula kwakhe emhlabeni ngoba thina besisalinde ukuba azosichazela ukuthi ngabe uyazazi yini izinsolo ezibhekiswe kuyena nokuthi ubethunywe ubani ukuba ayoshaya uthisha uMoloi. Nokho sekubuhlungu okwenzekile futhi sizwelana nezingane esezihlukumezeke ngokuphindiwe ngesihluku uNksz Mchunu abulawe ngaso. Thina singabazali besifisa nje ukuba naye ageze igama lakhe ngoba le nto esayizwa yokuhlasela esikoleni ayisiphathanga kahle ngoba iyasiphoxa. Okunye okusethusile ukuthi isoka leli kuthiwa linyamalale nekhadi lokuholela zingane nokunye okuyimininingwane kamufi,” kusho omunye wabazali ocele ukungadalulwa.
UNksz Mchunu kuthiwa uficwe amaphoyisa nomakhelwane ngesonto eledlule edindilizile engenawo namanxeba okushaywa kodwa enophawu lokuklinywa ngentambo nayo etholakale eduze kwakhe.
Kuthiwa izingane zikamufi zatshela omakhelwane namaphoyisa ukuthi unina uklinywe yisoka lakhe lathatha amakhadi akwaSassa labaleka.