Uyavela ‘odlwengule wabulala’ indodakazi
UZOVELA namhlanje eNkantolo yaKwaHlabisa owesilisa oneminyaka engu29 ngezinsolo zokuhlukumeza ngokocansi, abulale indodakazi angayizali ethi izingcolisile.
Umsolwa uboshwe ebhace eBuxedene KwaNongoma.
Ngo-Okthoba 14 nonyaka ngabo 4 ntambama kuthiwa ingane yentombazane eneminyaka emibili yashaywa ngenduku ngoba izingcolisile. Yayiswa emakhazeni azimele. Sekuhlolwa isidumbu kwatholakala ukuthi ingane ihlukumezekile ngokocansi yashaywa.
Kwavulwa icala lokubulala esiteshini saKwaHlabisa.
Bese kuphele inyanga esekubhaceni umsolwa.
Uyise wengane oneminyaka engu-50 igama lakhe elingeke lidalulwe, uthi ufuna nonina wengane aboshwe.
“Akukho engifuna kusale ngaphandle kuleli cala, kumele baboshwe bobabili ukuze kuzovela iqiniso. Ngashayelwa ucingo wunina wengane wathi ishonile, kade iphethwe umkhuhlane, wayilalisa bavuka isishonile. Ngabuyela emakhaya, ngalanda isidumbu emakhazeni sithi sizoyingcwaba ekhaya. Ingane bathi beyigeza bathola ukuthi ilimele, sabe sesithinta amaphoyisa yayiswa emakhazeni kwafike kwazwakala khona ukuthi ishayiwe, yahlukunyezwa ngokocansi. Unina wengane wathi akazi lutho ngalokho. Lokho kwangimangaza. Ngisola ukuthi wayevikela isoka lakhe,” kusho uyise wengane.
Kuthintwa unina wengane, udadewabo omdala uNksz Jabu Nxumalo unqabile ukuba kukhulunywe naye, wathi: “Imina umamkhulu wengane eyashona, angifuni nikhulume nonina wengane, akukho esizokusho. Uma nifuna izindaba ningaqhubeka,” esho egaklaza ucingo.
Okhulumela amaphoyisa KwaZulu-Natal, uColonel Thembeka Mbele, uthe uzovela eNkantolo yaKwaHlabisa namhlanje umsolwa.
“Uboshelwe icala lokunukubeza ngokocansi nokubulala ingane eneminyaka emibili,” kusho uCol. Mbele.
Kwesinye isigameko amaphoyisa aseHibberdene abophe owesilisa oneminyaka engu-37 ngecala lokudubula inkosikazi yakhe.
NgoNovemba 7 nonyaka ngo-8 ebusuku umsolwa wathinta amaphoyisa ewatshela ukuthi inkosikazi yakhe (39) idutshulwe emzini wabo ngabantu besilisa abangabazi. Umufi ubenenxeba lokudutshulwa ekhanda.
Emuva kophenyo lwamaphoyisa kutholakale ukuthi wumsolwa owadubula inkosikazi yakhe ngemuva kwengxabano.
UCol Mbele uthe umsolwa uvulelwe icala lokubulala, uzovela maduze eNkantolo yaseMzumbe.