Indida ngokubulawa komshushisi kwakhe
SEKUQUBUKE indida ngokudutshulwa komshushisi (57) obesebenza enkantolo yasePinetown okuthiwa udutshulwe ngamadoda amabili washona emzini wakhe oseNorthdene ngoMgqibelo.
Isolezwe lithole ukuthi umshushisi ubebuya kolanda indodakazi yakhe ehlala endaweni yabafundi kwenye inyuvesi eThekwini ebizovakasha ekhaya njengoba bekuyimpelasonto.
Kuvela ukuthi yize ebeshadelwe, ubehlala yedwa akuqondakali ukuthi unkosikazi wakhe oyiphoyisa osebenzela esiteshini sasePinetown kungani ebengahlali naye.
Isolezwe lithole ukuthi lo mshushisi ushadelwe wunkosikazi wesibili nyakenye kanti abantu abangathandanga ukucashunwa bathe bese kunezinkinga kulo mshado.
Bathe kuyadida ukuthi adutshulwe eyedwa bese kungebiwa lutho ukube bekungamasela abezokweba okuthile endlini.
Kuthiwa ngoMgqibelo ulande indodakazi ngabo-6.55 ntambama wase eyothenga izinto esitolo.
Ufike ekhaya ngabo-9 ebusuku wapaka imoto kwathi uma eyovala isango wadutshulwa ngamadoda amabili.
Kuthiwa indodakazi ebisendlini ilunguze ewindini yabona abantu ababili bephithizela egcekeni yathinta umfowabo imazisa ngosekwenzekile.
Isolezwe lithole ukuthi omakhelwane bathinte amaphoyisa emuva kokuzwa ukuqhuma kwesibhamu.
Ngebhadi amaphoyisa afice umshushisi eseshonile.
UColonel Thembeka Mbele wamaphoyisa KwaZulu-Natal uthe amaphoyisa aseMalvern aphenya icala lokubulala emuva kokudutshulwa kwendoda emzini wayo oseNorthdene.
Uthe okwamanje ayikaziwa imbangela yokudutshulwa kwale ndoda futhi akekho oboshiwe.