Asikaze sihlomule kwiVBS: abeSACP
ISOUTH African Communist Part (SACP) ithi izobathathela izinyathelo zomthetho abangcolisa igama layo ngokuthi yahlomula ekudliweni kwemali yaseVBS Mutual Bank.
Okhulumela iSACP kuzwelonke, uMnuz Alex Mashilo, uthe bathinte abameli babo ngodaba olushicilelwe yiphephandaba langeSonto lokuthi iSACP yahlomula uR3 million wathi iphephandaba alinabo ubufakazi.
“ISACP inamarekhodi okuthi imali yayo ivelaphi, akukho okufihlwayo uma senza umbiko wezimali. Asikaze sihlomule ngisho nangesenti kwiVBS noma kwiVele Investments. Siyayichitha imibiko yokuthi kunemali esayithola. Abasabalalisa le mibiko sizobathathela izinyathelo zomthetho,” kusho uMashilo.
Uthe uma kunobufakazi bokuthi kunamalungu eSACP ahlomula eVBS nawo azothathelwa izinyathelo zomthetho ngoba inhlangano ayihambisani nenkohlakalo.
Akusiye yedwa uMashilo oyikhahlelayo imibiko yokuthi iSACP yahlomula eVBS. UNobhala Jikelele wenhlangano, uDkt Blade Nzimande, usole abaholi be-EFF ngokusabalalisa le mibiko.
“Abaholi be-EFF yibona abasabalalisa la manga okuthi kunemali eyatholwa yiSACP eVBS ngoba befuna abantu babuke thina. Asikaze sihlomule eVBS,” kusho uNzimande.
USihlalo wekomidi lezimali ePhalamende, uMnuz Yunus Carrim ophinde abe yilungu lesigungu esiphezulu seSACP, ucele abasola inhlangano ngokuhlomula kwiVBS ukuthi beze nobufakazi obuseka izinsolo zabo.
“Kufanele i-EFF ize nobufakazi obeseka izinsolo zayo zokuthi iSACP yahlomula kuleli bhange njengoba ibifuna ngihoxe uma kudingidwa izindaba zeVBS. Ngikhulume noNobhala Jikele, uDkt Blade Nzimande, noMgcinimafa wethu, uNkk Joyce Moloi-Moropa ngalolu daba nabo bakuqinisekisa ukuthi ayikho imali eyatholwa yiSACP. Ngicela i-EFF ize nobufakazi iyeke ukusisola ngento esingayazi,” kusho uCarrim.