Kukhunjulwe abafela umzabalazo
INTSHA yanamhlanje isilibele ukusebenzisa izidakamizwa notshwala ayisanandaba nokuthi kunenqwaba yentsha eyanikela ngempilo yayo ukuze kutholakale inkululelo.
Lokhu kushiwo nguSihlalo wendlu yobukhosi boMdabu KwaZulu-Natal, inkosi Phathisizwe Chiliza, ngesikhathi kunomcimbi wokukhumbula abantu baseMgababa ababulawa ngesikhathi somzabalazo, obuseMnini, izolo.
Inkosi uChiliza ithe iyangabaza ukuthi abanikela ngempilo yabo ukuze kutholakale inkululeko bangakujabulela abakwenza ngenxa yokuthi abantu abasha bamanje inkululeko abayithokozelayo ngeyokubhema izidakamizwa nokuphuza ngokweqile.
“Abantu abasha ake babuyele ezintweni ezazenza ukuthi umphakathi uhlale ubumbene, phambilini kwakuba nemihlangano eyayenza ukuthi kwaziwe ukuthi endaweni ethize kwenzekani, uma kungabuya lezo zigungu umphakathi ungahlala ubumbene,” kusho yena.
UDkt Meshack Radebe uthe: “Ngiyafisa ukwazi ukuthi ngabe abashona uma bengavuka, bangavuma ukuthi bafela into okwakumele bayifele noma bangazisola ngokunikela ngempilo yabo, uma bebona isimo esikhona njengamanje, imibango yamathenda egcina ngokuthi kubulawane, ngabe yikho abakufela ukuthi uma siya okhethweni sikhethe abantu bese singakwemukeli ukuthi kukhona owehluliwe? Kungani silwa uma sehluliwe sengathi akufanele sikhethe abantu abangefani, vele kufanele ukuthi sikhethe abantu abehlukene, nakuqala kwakunjalo kodwa odle umhlanganiso kumele esekwe, kungaxatshanwa. Okwami lokhu kubulalana okungaka?,”
UMnuz Mkhaphezwa Cele, (80) owashonelwa ngamadodana amabili uSmangaliso noSthembiso ngesikhathi somzabalazo, uthe uyajabula ukuthi lisakhunjulwa iqhaza elabanjwa ngamadodana akhe ukuze kutholakale inkululeko.
Uthe uSmangaliso owayengusihlalo wentsha eMagabheni wanqunywa uqhoqhoqho, uSthembiso owayengusihlalo wentsha eMgababa wadutshulwa.
Imeya yeTheku, uNkk Zandile Gumede, uthe kubalulekile ukuthi abafela inkululeko bakhunjulwe ukuze sihlale sazi ukuthi siphumaphi. “Abantu abasha siyabakhumbuza ukuthi intuthuko ekhona namhlanje ikhona ngenxa yokuthi kukhona abafela ukuthi itholakale ngokulingana,” kusho yena.
Uthe lona ngunyaka esithupha kwenziwa lo mcimbi.