Umngcwabo wephoyisa lomgwaqo
UMBULALI wesikhulu samaphoyisa omgwaqo eMvoti kukholakala ukuthi ubesebenzisana nothile obengaphakathi emhlanganweni obekukhona kuwo lesi sikhulu.
Lokhu kushiwo uNgqongqoshe wamaPhoyisa, uMnuz Bheki Cele, enkonzweni yomngcwabo kaMnuz Thobani Ndaba (44) odutshulwe washona emagcekeni kaMasipala eMvoti, obuseCity Hall eMgungundlovu, ngoMgqibelo.
UCele uthe nakuba engeke ageqe amagula ngophenyo lwamaphoyisa ngokubulawa kukaNdaba kodwa angakuveza ukuthi kukhona obesebenzisana nombulali obengaphakathi kwamasipala obemtshela ukuthi uNdaba ukuphi.
“Sesiyazi ukuthi kunqanyulwe ucingo olubiye emahhovisi kamasipala futhi siyazi ukuthi ngubani owenze lokho. Ngeshwa okwamanje anginazo zonke izimpendulo ezidingwa wumndeni. Angifuni ukuyenyula le ndaba asilinde ithimba lamaphoyisa enza uphenyo aphothule uphenyo lwawo,” kusho uCele.
Uqhube wathi okwamanje ngeke asho ukuthi ukubulawa kukaNdaba kuhlangene nepolitiki noma kusondelene nomsebenzi wokulwa nenkohlakalo abewenza.
Usho kanjena nje kuningi ukuqagela emphakathini ngokubulawa kukaNdaba. Abanye bakholwa wukuthi ubulawelwe umsebenzi kamasipala wokuba umqondisi wophiko lokuphepha komphakathi.
Imeya kamasipala, uMnuz Thamsanqa Ngubane, ikuchithile ukuthi uNdaba ubulawe ngabadinwe wukuthi kuqashwe umuntu okungeyena owendawo wathi abantu baseMvoti bafuna umuntu owenza umsebenzi wakhe ngokuzimisela ukuze bathole izidingo abanandaba nokuthi ngowakuphi.
“Okwenziwe yisigilamkhuba wubulwane. Siyafisa ukwazi ukuthi ngubani obulale uNdaba sifisa nokwazi ukuthi umbulaleleni,” kusho yena.
UNgqongqoshe wezokuThutha kuzwelonke, uMnuz Blade Nzimande, uthe noma ngubani obulale uNdaba ufaka umunwe esweni likahulumeni.
“Amaphoyisa omgwaqo ayadutshulwa abulawe ngabasuke befuna ukusula ubufakazi ngamacala omgwaqo ababhekene nawo.
“Amanye ashayiswa ngabashayeli abangafuni ukuma uma ebamisa ngezimoto,” kusho uNzimande.
UMnuz Sihle Zikalala, uSihlalo we-ANC KwaZulu-Natal, uthe sebelahlekelwe yizishoshovu eziningi zale nhlangano ezibulawayo.
“Uma kubulewe umuntu ukuqashwa kwakhe okwenziwa yiqembu kuye kusolwe ukuqembukelana kwenhlangano kodwa kulokhu kubulewe umsebenzi, ngeke sisole inzondo yabantu baseMvoti ngoba akubona bonke abenze lokhu.
“Sonke sithembe ukuthi amaphoyisa azomthola umenzi wobubi,” kusho uZikalala.
UNksz Nolwazi Ndaba, udadewabo kamufi, uthe umfowabo ubewuthanda umsebenzi futhi ezwakala sengathi ujabule. Uthe bajabhile uma esebulawa kabuhlungu kanje.
“Ubeze antele athi ‘usayobangena’ ashaye nevosho, besingazi ukuthi kungagcina kunje,” kubalisa uNksz Ndaba.