Amalungu e-ANC afuna ingqunquthela eMabhida
UQALA phansi umsindo eMoses Mabhida eMgungundlovu ngemuva kokuthi amalungu e-ANC, afuna kube nengqungquthela yesifunda, ngoMgqibelo ethathe isinqumo sokuthi azoqala umkhankaso wokuyinyomfa kuze kube ayalalelwa.
NgoMgqibelo, amalungu abalelwa ngaphezu kuka-250 ahlangane ehholo lomphakathi eWoodlands athatha isinqumo sokuthi azoshukumisa.
Asuke ehholo lomphakathi eWoodlands ayoqhinqa ngaphandle kwamahhovisi esifunda edolobheni.
Okhulumela amalungu, uMnuz Sthembiso Nkuna ongusihlalo ku-ward 4 eMngeni, uthe isizathu esibenza basukume wukuthi ubuholi besifundazwe nobukazwelonke abufuni ukubalalela.
“Lapha eWoodlands bekuhlangene amagatsha e-ANC angu-76 kwangu-89 esifunda sonke. Amagatsha afuna ukuthi kusingathwe ingqungquthela yesifunda kodwa ubuholi bukazwelonke nobesifundazwe abufuni,” kusho uNkuna.
Uthe bona abafuni ukuyiswa engqungqutheleni wubuholi besikhashana ngoba abunawo amandla.
“Kumele kukhethwe ubuholi obuzoyisa inhlangano okhethweni hhayi indaba yobuholi besikhashana, enye into esikhala ngayo wukuthi ubuholi besikhashana abakhekile kahle njengoba bucheme kakhulu nohlangothi oluthile,” kusho uNkuna.
Usabise ngokuthi bazoqinisa umkhankaso wabo wokushukumisa kuze kube ubuholi buyabalalela.
Ubuholi bukazwelonke bathatha isinqumo sokuthi ingqungquthela yaseMoses Mabhida naseLower South Coast ibe ngemuva kokhetho lukazwelonke ngoba bugwema ukuthi inhlangano ingahlukani phakathi.
IMabhida, Lower South Coast neHarry Gwala ngezinye zezifunda ze-ANC KwaZulu-Natal ebezinomsindo ogcine uholele ekutheni kuphume imiphefumulo.
EHarry Gwala ingqungquthela yakhona igcine ibe khona kodwa kukhona abasikaza ukuwuphonsela inselelo enkantolo umphumela wayo.
Okhulumela i-ANC KwaZuluNatal, uNkk Nomagugu SimelaneZulu, usigxekile isinyathelo samalungu enhlangano eMoses Mabhida wathi kumele alinde uNobhala-jikelele, uMnuz Ace Magashule abuyele kuwona.
“La maqabane ambikela uNobhala-jikelele ngezikhalo zawo, ubengakabuyeli kuwona.
“Siyafisa ukuthi alinde kulandelwe lonke uhlelo lwangaphakathi enhlanganweni ngaphambi kokuthi kube khona izinyathelo azithathayo,” kusho uNkk Simelane-Zulu.