Bazethule kwi-ANC izikhalo zabo
ABANTU abaphila nebala elimhlophe baphonsele i-ANC inselelo bathi bafuna ukuvikeleka njengoba bekhala ngokungaphephi emphakathini.
Laba bantu bahlangane nobuholi be-ANC obebuholwa yiSekela likaNobhala wenhlangano esifundazweni uMnuz Sipho Hlomuka obebuhambele esifundeni iFar North ngoMgqibelo.
I-ANC inohlelo lokuhambela imiphakathi ukuze izwe izikhalo zabantu iphinde ibheke ukuthi ingangenelela kanjani.
UNobhala wenhlangano i-Albinism KwaZulu-Natal KwaMhlabuyalingana, uMnuz Nkosinathi Sithole, uthe bajabule kakhulu ngokuthola ithuba lokuhlangana nobuholi benhlangano ebusayo ukuze bethule izikhalo zabo.
“Sinezikhalo eziningi singabantu abaphila nebala elimhlophe njengoba sibulawa emphakathini abantu abasuke befuna izicubu zethu bethi bafuna ukwenza imithi,” kusho uSithole.
Uthe bayafisa ukuthi uhulumeni aqhamuke nendlela yokuthi bavikeleke ukuze kuphele isihlava sokubulawa kwabo.
“Ezinye izinto esikhala ngazo wukuthi asinikwe amathuba emisebenzi alinganayo nabanye abantu hhayi le nto yokuthi thina kunemisebenzi esingeke sikwazi ukuyenza,” kusho uSithole.
Uthe bafuna nokuthi uMnyango wezeMfundo ubabhekelele abantu abaphila nebala elimhlophe.
“Uthola ukuthi uma kubhalwa iphepha ezikoleni kuthiwa lingamahora amabili thina asicatshangelwa ukuthi sibuye singaboni kahle,” kusho uSithole.
Uphinde wakhala nangokuhlukunyezwa kwabesifazane abaphila nebala elimhlophe ezikhungweni zempilo.
“Omama abaphila nebala elimhlophe bathi bayacwaswa ezibhedlela uma beyobeletha, abahlengikazi bakhuluma kabi ngabo kube sengathi bona abafanelwe wukuya ocansini,” kusho uSithole.
Uthe enye into abayicelile wukuthi kuvulwe umfanekiso weqhawekazi labo uNksz Thandazile Mpunzi owabulawa kwabe sekucwiywa izitho zakhe zomzimba ngo-2016.
“Lo mfanekiso kade wenziwa asazi ukuthi yini ebambile ukuthi uvulwe ngokusemthethweni, noma kulindwe ukuthi kuze kufike isikhathi sokukhankasa ukuze kugaywe ngathi amavoti,” kusho uSithole.