Izifo zomqondo kwabesifazane abasemajele
UCWANINGO lwakamuva luveza ukuthi abesifazane ababoshiwe bahaqwe yizifo ezithikameza umqondo ikakhulu ukhwantalala.
Lolu cwaningo olwenziwe yikhomishini egqugquzela ukulingana ngokobulili, iCommission for Gender Equality (CGE) luveze ukuthi abesifazane abaningi ababoshiwe banezifo ezithikameza umqondo.
Ngokwenhlangano yezempilo emhlabeni wonke iWorld Health Organisation (WHO) u-40% wezigameko zokufa kweziboshwa ejele owokuzibulala nokusho ukuthi yisona sizathu sokufa kwabantu abasuke bengaguli.
Ngo-2017 kuvele ukuthi eziboshweni ezingu-52 ezishonile ezingu-24 zizibulele (ezingu-15 zizilengisile kwathi eziyisikhombisa zeqisa kwimishanguzo, ezimbili zaphuza uphoyizeni).
Ngokwalo mbiko kuvele ukuthi abesifazane ababoshiwe abangomama bebengakwazi ukumelana nokuhlukaniswa nezingane zabo.
“Omama bebehlala ngokukhathazeka ngezingane zabo nokunakekeleka kwazo, ikakhulu labo izingane zabo ezihlaliswe nezihlobo ezingathembekile. Abanye baveze ukuthi ukhwantalala ludalwa ukungabibikho eduze kwemindeni yabo,” kusho umbiko.
Abesifazane abebeyingxenye yocwaningo bakhale ngokuthi ukungabibikho eduze kwemindeni yabo kwenza baphuthwe yizikhathi ezibalulekile nemindeni yabo njengemingcwabo yabangani nezihlobo zabo.
Abanye bebekholwa wukuthi ukuboshwa kwabo kube nomthelela ekutheni bahlukane nalabo abathandana nabo nabebeshade nabo.
Ucwaningo luveze ukuthi esinye isizathu sokudlanga kokhwantalala kubantu besifazane ababoshiwe kube ukuboshwa uqobo.
Bathe ukuboshwa bekubenza babukeke bengabantu abangamukelekile emiphakathini yabo nasemindenini.
Bathe bekucacile ukuthi ukhwantalala oluhambisana nokuboshwa beludalwa nawukuthi abantu abaningi bazitshela ukuthi abantu besilisa abavame ukwenza ubugebengu.
Kuvele nokuthi iningi labantu besifazane ababoshiwe, ikakhulu ejele lasePollsmoor, eWestern Cape, bebenenkinga yokusebenzisa izidakamizwa ngoba bezama ukukhohlwa yizinkinga ababhekene nazo.
Bathole nokuthi iningi labantu besifazane ababoshiwe babhekane nezinkinga eziningi phambilini okubalwa kuzo ubudlelwane obunodlame, ukukhula ngaphandle kwabazali nokukhula emakhaya ahlwempu.
Udokotela wengqondo wasejele lasePollsmoor uthe bathole ukuthi iningi labantu abebeza kuye bebenezinkinga zokuhlukumezeka ezingazange zibhekwe besakhula.
Abanye babo kuvele ukuthi yingoba abakaze bathole kalula izinhlelo zokululekwa ngokomqondo ngaphambi kokuboshwa.
Bathole nokuthi izinhlelo zokwelashwa kwezinkinga ezithikameza umqondo azikho esimeni esifanele emajele.
Kwamanye amajele odokotela abathathu bengqondo bebenakekela iziboshwa ezingu-698.